EleZimbabwe leleBelarus ngoMvulo lilobelane isivumelwano esibiza amadola angafika alikhulu lamatshumi amahlanu -$50 million dollars esizabona ilizwe lisamukela uncedo ezigabeni zokwembiwa kwamatshe aligugu, ukwakha imigwaqo lamadamu, kanye lezokulima.
Umsakazo weZBC uthi uMnu. Mnangagwa, yena oseBelarus, uhlangene lomongameli welelolizwe uMnu. Alexander Lukashenko yena ogcizelele ukuthi ilizwe lakhe seliqinisa ubudlelwano leleZimbabwe kwezomnotho ukwenzela ukuthi libe yindawo eqinileyo kwezokuthengiselana lamanye amazwe.
Ukuze sihlaziye loludaba, sixoxe loMnu. Masimba Kuchera, ingcwethi ecubungula ezomnotho welizwe, yena othi kuyadanisa ukuthi eleZimbabwe selithembele emazweni anjenge Belarus angaphansi kwezijeziso zomanyano weEuropean Union ngenza yokwephulwa kwelungelo loluntu.
Wengezelele wathi eleZimbabwe lidinga imali ephezu kwamadola angamabhiliyoni alitshumi ukuvuselela umnotho njalo kufanele lilungise imithetho yalo elizweni andubana lidinge ubudlelwano lamanye amazwe.
Kusenjalo, umongameli Mugabe, yena ongumgcinisihlalo womanyano weAfrican Union loweSADC, use Malabo eEquitorial Guinea emhlanganweni oqalise ngoMvulo uphela ngoLwesibili, owokucubungula udaba lomkhuhlane weEbola, wona obulele abanengi emazweni agowela ele Liberia, Sierra Leone, Guinea, le Nigeria.
Your browser doesn’t support HTML5
Ingxoxo LoMnu. Masimba Kuchera