Ibandla leMDC-T selichothoze umsekeli kaMongameli Robert Mugabe uMnu Phelekezela Mphoko ngamazwi akhe okuthi uMugabe kazange abe lesandla lokwenza lombuqazwe weGukurahundi, wona owabulalisa abantu abedlula inkulungwane ezingamatshumi amabili eMidlands leMatabeleland.
Ekhuluma ekolitshini leGreat Zimbabwe University ngoLwesine, uMnu Mphoko uthe umbuqazwe lo waqoqwa ngamazwe angentshonalanga ngenjongo yokubangela ukungahlaliseko elizweni.
UMphoko, yena ongumphathintambo njalo wogatsha lwezokuxolelana, ucunule abanengi ngamazwi afanayo kunyanga ezedluleyo.
Lanxa engakaze axolise, uMugabe ngokwakhe kakaze akulandule ukuthi ibutho lakhe leFifth Brigade yilo elabulala abantu beMidlands leMatabeleland.
Umsekeli wesikhulumeli seMDC-T uNkosazana Thabitha Khumalo uthi uMphoko kalungelanga ukuba kusikhundla sakhe, ngalokho kumele asuke.
Your browser doesn’t support HTML5
Ingxoxo loNkosazana Thabitha Khumalo