UMnu. Thulani Ndebele, umongameli webandla lezombusazwe elisungulwe ngoLwezi lonyaka eleMovement for Democratic Change Zimbabwe, elaziwa ngokuthi yiMDC Zimbabwe, uthi ibandla lakhe yilo kuphela elinganqoba ibandla elibusayo eleZanu PF kukhetho oluzakwenziwa ngomnyaka ka2023.
UNdebele, owazalwa ngomnyaka ka1977 eShurugwi eNkabazwe, uthi ukuncindezelwa kwabantu eZimbabwe yikho okwamenza wangena ezombangazwe.
“Ukuhlupheka kwabantu, ukuswelakala kwemali, ukuswelakala kwezinto zonke nje, ezenza ukuthi umuntu aphile kahle, lokuswekala kwemisebenzi … Ama-youth amanengi kawasebenzi, lezinto ezinengi engingaziqamba elizaziyo. Yizo izinto ezangenza ngingene kwezombangazwe ngo2017 eqembini elazakala ngokuthi yiNPP elikaMai (Joice) Mujuru."
Kukhetho olwenziwa nyakenye, okaNdebele wayemele ancintise ekubadla leNational People’s Party esigabeni seShurugwi kodwa watshiya sokusele insukwana ukuthi lwenziwe.
"I withdrew in favour of MDC candidate ngoba ngabona ukuthi ukulwisana lomunye wami oku-opposition amachances owokuthi sicine sithathelana amavotes ebemanengi so mina nga withdrawer in favour of the candidate yeMDC. Ngazotshiya after ama elections ka2018 ngoba sasisingasezwani ukuthi mina why ngasupporter nga withdrawer nga supporter iMDC candidate."
Amabandla ezombusazwe manengi okwamagama kwele Zimbabwe njalo abantu bathi kawancedi lutho. UMnu. Ndebele uchaza isizatho sokubumba ibandla lakhe.
"Sabona ukuthi kulawa amabandla akhona akula bandla elimela abantu, akula bandla elikhala labantu. MDC-T ekaMaKhuphe eyiMDC kaTsvangirai, ngibona engani bachitha isikhathi esenengi belwisana loChamisa. UChamisa laye udlalisa isikhathi esinengi elwisana leZanu PF. Thina sabumba ibandla leMDC Zimbabwe sisenzela khonokho ukuthi sigoqele umuntu wonke libe libandla labantu"
Uthi ibandla lakhe alifani lamanye kwele Zimbabwe.
"MDC Zimbabwe ngeyomuntu wonke oseZimbabwe, itshiyene lamanye amabandla asebenzisa amagama njengokuthi MDC Tsvangirai, MDC kaKhuphe, MDC Alliance kaChamisa kumbe MDC ethize befaka igama lomuntu. Leyi yiMDC yeZimbabwe yonke jikelele, asiyo yomuntu. We believe in dialogue, ukukhuluma labantu on ground because they are the ones with solutions."
Ucela abantu ukuthi basekele ibandla lakhe. "Sinxusa uzulu wonke eZimbabwe, iyouth, ogogo, labokhulu.Yikho iparty yethu siyibiza MDC Zimbabwe. Siyazi ukuthi izinto azimanga ngendlela okumele zime ngayo eZimbabwe. Wozani sibonisane ukuthi singalilungisisa njani ilizwe lethu ngoba labo abakhona esasibathembile ukuthi bengalungisisa sebehlulekile."
Kodwa-ke uMnu. Douglas Mabuza, ilunga l leMDC T elikhokhelwa Nkosazana Khuphe, uthi uNdebele uzimotshela isikhathi.
"Mina ngisekela ibandla leMDC, okulibandla eliyilo elabantu njalo lalikhokhelwa nguTsvangirai. Okwamanje sokulokukhokhelwa ngabanye abantu nje nje, okungamabandla okuthiwa yiMDC Zimbabwe lamanye amaMDC awe fake. Ibandla leMDC yilo ibandla elisemthethweni njalo ngiyabe and ngizalisekela ngomnyaka ka2023 ngesikhathi sokhetho, liyabe likhona ibandla leMDC-T, elikhokhelwa ngumama uKhuphe.”
UMnu. Joseph Tshuma, olilunga leCentral Committee kubandla le Zanu PF, uthi ibandla lakhe alethuswa ngamabandla amanengi abunjwayo njalo akuyindawo lizahlala libusa.
"Amabandla amanengi ahlala ebunjwa ngabantu abatshiyeneyo. Kodwa thina siyiZanu PF asibhuluki. Sibonile iMDC ihlephuhlephuka yaba ngamabandla amanenginengi kodwa thina siyale lokhe simile siyiZanu PF. Sigxilile ebantwini sizimpande eziphansi ebantwini,ngezenzo kungemazwi."
UNdebele wafunda ezikolo ezigoqela eseNashville eGweru engakavuli inkampani yakhe Thulani Technology eMzansi Africa.
Your browser doesn’t support HTML5
MDC Zimbabwe: Sizanqoba Kukhetho Oluzayo