Ibandla le Movement for Democratic Change (MDC-T) lithi uMnu. Morgan Tsvangirai, osanda kufanisela ukuthi ulakho ukutshiya isikhundla sakhe, ulelungelo lokukhetha ongathatha isikhundla sikamongameli webandla leli.
UNkosazana Thabitha Khumalo, umsekeli wesikhulumeli seMDC-T, uthi isisekelo sombuso sebandla leli sikubeka sobala ukuthi uTsvangirai ulelungelo lokukhetha iziphathamandla zebandla leMDC-T okugoqela ongathatha isikhundla sakhe nxa kungakenziwa umhlangano weCongress okumele wenziwe ngomnyaka ka2019.
Uthi akumelanga abantu balwisane ngesikhundla sikaTsvangirai osesibhedlela kwele South Africa lapho ayelatshwa khona isifo semvukuzane yamathumbu amakhulu (cancer of the colon).
Umuntu okhethwe nguTsvangirai kumele ahlolisiswe ngamadale ebandla leli engakathathi isikhundla sikamongameli, umsekeli kamongameli kumbe ezinye eziphezulu.
UTsvangirai ukhangelelwe ukuthi uzatshiya isikhundla sakhe ngenxa yesifo semvukuzane.
Kodwa-ke ingcwethi kwezombusazwe, uDokotela Nkululeko Sibanda, osekolitshini yemfundo yaphezulu eBhilithani, uthi kuyamangalisayo ukuthi bambalwa abantu abakhangelelwe ukuthi bangathatha isikhundla sikamongameli webandla leMDC-T.
Your browser doesn’t support HTML5
UTsvangirai Ulelungelo Lokukhetha Ozathatha Isikhundla Sakhe