Ibandla le MDC-T elikhokhelwa ngu Nkosazana Thokozani Khuphe lithi lizancintisa kukhetho oluzayo olwama by-elections lisebenzisa ibizo elithi MDC Alliance. Lokhu kuvezwe ngumgcinisihlalo weMDC-T uMnu. Morgan Komichi emcimbini oqhutshwe yilelibandla owokuthakazelela iminyaka engamatshumi lanye-21 selokhe labunjwayo, embuthanweni ubuseMorgan Tsvangirai House eHarare.
Lanxa kulokulwisana phakathi kwebandla leli lele MDC Alliance elikhokhelwa ngu Mnu Nelson Chamisa kubangwa ubukhokheli, iMDC-T ithi yiyo yodwa elemvumo yokuthakazelela lolu usuku.
Ekhuluma kulumhlangano, unobhala jikelele webandla leMDC-T uMnu Douglas Mwonzora uthe ibandla leli lilandela izinqumo ze dale le Supreme Court ezokuba owayehola leli ibandla uMnu Nelson Chamisa lenkokheli yaphezulu beme ukulikhokhela.
Uthe ibandla le MDC-T kalisoze libe lomkhawulo ekuxotsheni abantu edale le phalamende kanye lakumakhansili, esithi amalunga axotshwayo yilawo angahloniphi isisekelo salelibandla ngokulandela ibandla elikhokhelwa ngu Mnu Nelson Chamisa eleMDC Alliance.
UMnu. Mwonzora uqhubeke wathi akumangalisi ukuxotshwa kwamalunga edale lephalamende labamakhansili, esipha umzekeliso womnyaka ka 2014 lapho owayekhokhela ibandla leli umuyi uMnu. Morgan Tsvangirai owaxotsha uMnu. Tendai Biti labanye bakhe ngemva kokuba behluleke ukulandela imithetho yebandla.
UMnu. Mwonzora uthe i-MDC-T isixoxisane labammeli bamazwe afana le South Africa, Malawi, Britain le Australia emizameni yokuxazulula inkinga ezibhekane lele Zimbabwe.
Umkhokheli webandla leli uNkosazana Khuphe utshele amalunga alumhlangano ukuba amalungiselelo ombuthano omkhulu owe extra ordinary congress aqhubekela phambili.
“Ngiyazigqaja ngomhlangano lo. Umhlangano owazalwa yizisebenzi ngo 1999. Umntwana lo ebelethwa wangena kukhethi elenyanga ezilutshwane. Sancintisana lebandla elalileminyaka engamatshumi amabili kodwa sathola ama seats angu 57”
UNkosazana Khuphe utshele abakade besemhlanganweni lo ukuba ibandla lakhe lifisa ukuba imuli ye Zimbabwe iphile impilo engcono.
“Ngilephupho. Iphupho lami ngelokuthi uzulu wonke we Zimbabwe abe lempilo engcono. Ngilesifiso sokuba abantwana be Zimbabwe babe lendawo zokuhlala, izibhedlela lezikolo. Yilo iphupho lami”
Ibandla leMDC-T ligcizelele ukuthi lizancintisa kukhetho lwama by elections olukudinga abammeli bendawo ezitshiyeneyo zelizwe ephalamende kanye lamakhansila, lawo axotshwa ngenxa yokusekela ibandla le MDC Alliance.
Umgcinisihlalo we-MDC-T uMnu Morgan Komichi uveze ukuba akusiqiniso ukuba ibandla leli selilobudlelwano lele ZANU PF, njengalokho okutshiwo ngabe bandla le MDC Alliance, esithi bona bazamela iqiniso lenkululeko yabantwana beZimbabwe.
Uqhubeke wathi bazasebenzisa indlela zokukhulumisana lohulumende esithi kungehlula lokhu ibandla leli lizatshengisela emigwaqweni ngokuthula lilandela iziqondiso ezimunyethwe kugwalo lwesisekelo sombuso welizwe.
Ibandla le MDC Alliance liqina ngelokuthi iMDC T isetshenziswa libandla le ZANU PF ukubhidliza amabandla aphikisayo kuleli kodwa eleZANU PF lithi kalilani lokulwisana kwamabandla la.
Ibandla leMDC Alliance elikhokhelwa nguMnu. Nelson Chamisa lithi eleMDC-T liyazikhohlisa ngokuthi lingasebenzisa ibizo elithi MDC Alliance. UMnu. Nkululeko Sibanda, isikhulumeli sikaMnu. Chamisa, utshele iStudio 7 ukuthi bazakwethula umbiko ogcweleyo ngemva kokucubungula loludaba njengebandla.
Your browser doesn’t support HTML5
UMlondolozi Ndlovu Usethulela Loludaba