Kulandela umhlangano omkhulu oweCongress yeMDC-T ngempelaviki, inengi lisola indlela ugwalo lwesisekelo salelibandla oluguqulwe ngayo ebone ukwengezelelwa kwamandla omkhokheli walelibandla uMnu. Morgan Tsvangirai.
UMnu. Tsvangirai uselamandla okuxotsha ingqe ngubani kudale leStanding Committee, njalo nguye oseqondisa unobhalal jikelele emsebenzini wakhe, okukhomba ukuthi unobhala jikelele lo usethathelwe amandla kulelibandla.
Kodwa okhethwe ukuba ngumqoqi wenhlelo zalelibandla kulumhlangano uMnu. Abednico Bhebhe utshele iStudio 7 ukuthi umhlangano lo uqhubeke ngemfanelo njalo amalunga alelibandla asuthisekile ngokwenzakeleyo. UMnu. Bhebhe, usekelwa nguMnu. Thamsanqa Mahlangu omela iNkulumane edale lephalamende kulesisikhundla.
Olunye udaba olusegudwini ngomhlangano we Congress le, yikunqotshwa kowayengumqoqi wenhlelo zalelibandla uMnu. Nelson Chamisa nguMnu. Dougals Monzora owayeyisikhulumeli salelibandla kusikhundla sika nobhala jikelele.
Ezinye iziphathamandla zalelibandla ezinqotshiweyo ezikhundleni ezimqoka zigoqela uMnu. Amos Chibaya, Tapiwa Mashakada, kanye loGift Chimanikire.
Oseyisikhulumeli salelibandla nguMnu. Obert Gutu, esekelwa nguNkosazana Thabitha Khumalo. Umgciningcebo kulelibandla usenguNkosikazi Theresa Makone njalo umsekeli kamgcinisihlalo ulokhu enguMnu Morgan Komichi.
Ukuhlaziya loludaba, uSithandekile Mhlanga weStudio 7 uxoxe loMnu. Mlamuli Nkomo yena othi ukuguqulwa kwesisekelo salelibandla kuzahlupha amalunga alelibandla kwelakusasa.
Your browser doesn’t support HTML5
Ingxoxo LoMnu. Mlamuli Nkomo