Isiphathamandla sebandla leMDC elikhokhelwa nguMnu. Welshman Ncube uMnu. Lionel De Necker, owayengu mayor wedolobho leGwanda njalo engumabhalane wogatsha olubona ngokwabiwa kwezabelo kuMDC, usetshiyile umsebenzi kulelibandla esola inkokheli yalo ngokwehluleka ukufeza izifiso zabantu.
Encwadini ayilobele uMnu. Ncube ngoLwesihlanu, uMnu. De Necker uveze izizatho ezinengi athi zibuyisela lelibandla emuva, ezigoqela ukuxoxa kwamalunga alo kumakhelekhukhwini ka whattups, endaweni yokuqhuba imihlangano, kanye lokwesaba ukuqondisa umkhokheli walelibandla.
Isikhulumeli salelibandla uMnu. Kurauone Chihwayi utshele iStudio 7 ukuthi ibandla lakhe liyamukele lincwadi lamuhla, kodwa alizihluphi ngayo ngoba lilungiselela ukhetho luka 2018, njalo okulotshwe kulincwadi akusoqiniso.
Kodwa uMnu. De Necker uthi uma ngamazwi akhe njalo njalo iStanding Committee yalelibandla yiyo ethatha izinqumo ezimqoka woma amalunga alikhomithi engakhethwanga nguzuluabantu, kukanti iNational Executive Council ayisalalelwa.
Uqhubeke wathi uMnu. Ncube useyehlulekile ukukhokhela lelibandla ngoba enguntandokayiphikiswa, kukanti leziphathamandla zalelibandla ziyesaba ukuphumela egcekeni zikhulume iqiniso ngokuthi sokufanele kuguqulwe inkokheli yalelibandla.
Your browser doesn’t support HTML5
Ingxoxo LoMnu. Lionel De Necker
Kusenjalo, ibandla leMDC-T lethule umbiko ngoLwesihlanu linxusa abantu emkhosini ozakwenzelwa eNharira Business Centre eChivhu ngoMgqibelo, owokuthakazelela ukufikisa iminyaka elitshumi lesithupha eyokubunjwa kwalo owe "MDC @ 16: Determining the defining moment"