Umkhokheli womanyano wamabandla aphikisayo owe MDC Alliance, uMnu. Nelson Chamisa, uthi inhlanganiso yeSouthern African Development Community (SADC) kumele yenze umhlangano wesiphangiphangi wokukhulumisana lenkokheli yeZimbabwe Electoral Commission (ZEC) leye lizwe leZimbabwe ngokwehluleka ukulungiselela ukhetho oluzakwenziwa ekupheleni kwenyanga.
UChamisa utshele intathelizindaba eHarare ngoLwesibili ukuthi kumele iSADC yenze umhlangano loNkosikazi Priscilla Chigumba, umgcinisihlalo weZEC kanye lohulumende kaMongameli Emmerson Mnangagwa ngendlela okulungiselelwa ngayo ukhetho oluzayo.
Uthi usezamile ukwenza umhlangano labantu laba kodwa sokwehlule ngakho-ke usefuna ukuthi umanyano weSADC ungenele kudaba lokhetho kwele Zimbabwe.
UChamisa uthe abomanyano we MDC Alliance abasoke baliphinde iphutha abalenza kukhetho luka 2008 loluka 2013.
Umanyano weMDC Alliance ukhala ngokuthi iZEC isivotise amapholisa lamasotsha ingakhulumisananga lamabandla ezombusazwe njalo ukhetho lolu belusenzelwa enkambeni zamapholisa lamasotsha okungekho emthethweni.
Ukhetho lolu lubizwa ngokuthi yipostal voting.
Umanyano lo ukhala njalo langokudindwa kwamaphepha okuvota ama ballot papers kungakhulunyiswananga lamabandla aphikisayo okumele abone iphepha leli lingakasetshenziswa.
Your browser doesn’t support HTML5
Udaba Esilethulelwe NguMavis Gama