Umgcinisikhwama webandla leMDC Renewal Team uMnu. Elton Mangoma uthi udaniswa ludlakela lokulwisana phakathi kweziphathamandla zebandla lakhe kulandela ingxabangxoza eqhamuke ngoLwesibili ngemva kokuthi esinye isiphathamandla salelibandla uMnu. Believe Tevera ethese uMangoma icala lokumthathela umkakhe.
Ekhuluma emhlanganweni lentathelizindaba eHarare ngoLwesithathu, uMnu. Mangoma, obekhatshwe ngumkakhe njalo ebhanditshile ekhanda, uliphikile icala aletheswayo.
Ibandla leMDC Renewal Team selibumbe ikhomithi yokuhlolisisa loludaba, njalo amalunga abalisa uMnu. Solomon Madzore, ongumgcinisihlalo wogatsha lwabatsha, uMnu. Jacob Mapfume isikhulumeli , kanye loNkosikazi Lucia Matibenga, ongumsekeli kamgcinisihlalo walelibandla.
Ukuze sizwe okunengi ngaloludaba uSithandekile Mhlanga weStudio 7 uxoxe loMnu. Reggie Moyo, umqoqi wenhlelo zalelibandla, yena othi akusoqiniso okunye okukhulunywa nguMnu. Mangoma okugoqela ukuthi kulokulwisana lokutshothsozela udlakela phakathi kweziphathamandla zeMDC Renewal Team.
Your browser doesn’t support HTML5
Ingxoxo LoMnu. Reggie Moyo