Wakhula egonjolozelwe yibuyanga obenza wehluleka lokuqeda isikolo njalo umangoye wayelala eziko abazali bakhe bengenelisi ukuphandela imuli ngemfanelo.
Kodwa uMnu. Tinashe Basa kazange alahle imbeleko ngokufelwa. Waqhubeka edinga indlela zokugcwalisisa izifiso zakhe lanxa wayengayitholanga imfundo ayeyikhangelele ekukhuleni kwakhe.
Elinye iphupho lakhe lalingelokusungula inhlanganiso encedisa abantwana abaswelayo njengaye.
Lelo ke lagcwaliseka ngezinye indlela ngoba wenelisa ukuthola umsebenzi kunhlanganiso egcina intandane koBulawayo ethiwa yiZimKids Orphan Trust.
UTinashe ungomunye wabasakhulayo beZimbabwe abakuhlelo lweMandela Washington Fellowship abangamatshumi ayisithupha abazakuya kweleMelika ngoNhlangula ukuyaqhuba izifundo zobukhokheli.
“Ithuba leli liyangithabisa ikakhulu nxa ngikhangela indlela engakhula ngayo,” kutsho uMnu Basa. “Lapha esengikhona kathesi kutshengisa sobala ukuthi ngiyaphumelela empilweni.”
UTinashe Basa lentandane ezincediswa yinhlanganiso yakhe yeZimKids
UBasa uthi wakhula edubeka kakhulu abazali bakhe besilela entweni ezinengi, okwenza wehluleka ukuqeda isikolo ngendlela ayeyikhangelele.
“Sasithwala nzima sibili ukuze sithole imali yesikolo. Ngangifisa ukuthi ngingakhula ngisebenze labantwana ngibancedisa njalo ngisipha abaswelayo,” uqhubeke echasisa uMnu Basa.
“Kodwa angisenelisanga ngoba abazali bami abangitholelanga imali yokuthi ngiqedise ukufunda. Kusukela khonapho ngaqhubeka ngilesifiso sokusebenza labantwana.”
Abantwana abanengi abancediswa yinhlanganiso yeZimKids ngabatshiywa ngabazali bebulawa yisifo sengculazi kanye leminye imikhuhlane etshiyeneyo.
UTinashe Basa lentandane ezincediswa yinhlanganiso yakhe yeZimKids
Luzamphathisa ngayiphi indlela uhlelo lweMandela Washington Fellowship uMnu Basa?
“Kunhlelo zethu sihlangana lenkinga ezinengi ezifana lokuthi abanye abantwana bayazithwala bebancane.
“Ngakho ngikhangelele ukuthi ngingahlangana labanye abasakhulayo abavela emazweni atshiyeneyo sikhulumisane labo sizwe ukuthi bona baziphatha njani indaba ezinje,” kutsho uBasa.
Your browser doesn’t support HTML5
Ingxoxo loMnu Tinashe Basa
Uhlelo lweMandela Washington Fellowship lusungulwe nguMongameli weMelika uMnu Barack Obama eminyakeni edluleyo ngenjongo yokulolonga abasakhulayo beAfrica ukuthi babe ngabakhokheli abalohlonzi.
UMnu Basa uzaqhuba izifundo zobukhokheli okwenyanga eyodwa lengxenye ekolitshini le Appalachian State University eNorth Carolina.