Inengi lezizalwane zeZimbabwe ezihlala kweleSouth Africa lithi lanxa liloyisa ukuthi ibandla leZanu PF likhitshwe embusweni, lithi libona kusibanzima ukuthi uhulumende avume ukusuka ededele ibandla eliphikisayo eliyabe linqobile.
Eminyakeni engamatshumi amathathu lasikhombisa edluleyo iZimbabwe ibingakaze ibelomunye uMongameli ngaphandle kukaMnu Robert Mugabe.
Ukugenqulwa kukaMugabe embusweni libutho nyakenye sokungena uMongameli eMmerson Mnangagwa kuvuselele ithemba labanengi lokuthi lolu khetho luzaletha ibandla elitsha loMongameli omutsha ikakhulu nxa kukhangelwa ukuthi ukuphuma kukaMugabe kwatshiya iZanu PF idabukene phakathi.
Kodwa Ithemba lelo liya lifiphala kwabanengi.
"Bebebhekele kakhulu ekulweni bebanga izikhundla lezinto ezinjalo, kwasekusiba lenkinga futhi yokubana iopposition ilahlekelwe ngumholi wayo uMorgan Tsvangirai onguye obekade eyibambile obengakhona ukuthi ayenze amathuba abo amanengi ukubana be wine," kutsho intathelizindaba yeZimbabwe uMkhululi Chimoi ekhuluma ngebandla leMDC-T.
Ingcitshi kwezombusazwe uMnu Gideon Chitanga uthi iZimbabwe Electoral Commission (ZEC) isebenza ngendlela esolisa abanengi.
"Kunzima ukuthi kuzenzakalani ngenxa yezizatho ezinengi esizaziyo lesingazaziyo. Ukunqoba kwamabandla aphikisayo kuzaba nzima kakhulu. IZEC ilubambe butshapha lolukhetho kwaqubuka imibuzo eminengi nge voters roll. Ngibafisela ukunqoba kodwa ithemba alikho," kutsho uChitanga.
Ngakolunye uhlangothi abanye bathi ukwehluleka kwebandla leMDC-T ukumanyanisa icele elisekela uNkosazana Thokozani Khuphe lelisekela uMnu Nelson Chamisa, sekuhle kwalingcwaba iphupho lokuguqula uhulumende.
Omunye wabasungula iMDC uMnu Solomon Chikowero, uthi uhlupho alukho ekuthini amabandla aphikisayo kawenelisi ukunqoba kodwa lusekuqilibezeleni okwenziwa yiZanu PF.
"I Alliance ukuwinner izawinner but ukuthi iZanu freely izabanikeza ipower? Angikakuboni lokho. Ma sizokubona kuzabe kuqala ngaye umnumnzana Emmerson Mnangagwa. But uMnangagwa wafunda from uMugabe".
Unobhala jikelele webandla leZimbabwe Communist Party uMnu Ngqabutho Mabhena uthi kusegcekeni ukuthi loba iMDC Alliance inganqoba, uhulumende kaMnangagwa osegcwele abebutho ezikhundleni eziphezulu, kasoze avume ukudlulisela phambili intambo zombuso.
"Akujwayelekanga ukuthi abantu abathethe umbuso bewuhluthuna, bafaka impilo zabo engozini befake ama tank emilitary bese bethatha umbuso lo bawunike ama civilians. Yikhoke asiboni ukuthi amabandla aphikisayo anganqoba ekhethweni oluzayo," kutsho uMabhena.
Your browser doesn’t support HTML5
aba lwamathuba okunqoba kwamabandla aphikisayo siluphiwa nguBenedict Nhlapho