Omunye wabagcinisihlalo bekomidi ekhokhela uhlelo lokulotshwa kwesisekelo sombuso esitsha, uMnu Douglas Mwonzora uthi uhlelo lolu luhambe kuhle kakhulu endaweni zelizwe ezitshiyeneyo ngoMvulo.
Wengeze wathi ezinye zengxaki ebezikhona sezilungisisiwe. Kodwa imbiko esiyamukeleyo ikhomba ukuthi eMatabeleland North amanye amalunga ekomidi ekhokhela uhlelo lolu ahamba engela macamera lama recorder, okuyinto esolwa ngamacele eMDC womabili kanye lozulu jikelele.
I Management Committee ibimele ihlangane ngoMvulo ihlaziye okuhluphayo, kodwa ibikwa sizahlangana ngoLwesibili. Uzulu ukhala ngokuthi katholi imbiko eneleyo ngemihlangano yokuthapha imbono yakhe ngafuna kungene kusisekelo sombuso esitsha.
Omunye wabahlaziya indlela uhlelo lolu oluqhutshwa ngayo uNkosazana Linda Mpofu utshele iStudio 7 ukuthi eMatabelelend South uhlelo lolu luhamba kuhle kodwa uzulu kahambi emihlanganweni ngoba engelalwazi lwayo.
Kunjalo nje isiphathamandla seZanu PF uMnu Absolom Sikhosana ukhuthaze uzulu ukubana aphatheke ngobunengi bke kuloluhlelo, kungxoxo ayenze loNtungamili Nkomo weStudio 7.