Izakhamizi zakoBulawayo ezivele zibhekane lodubo lwamanzi kanye lokumemetheka ngesiqubu esiphezulu komkhuhlane weCovid-19, zikhala ngokuthi lezi nhlupho sezisengezwa yikutshona kwabantu belayinele amanzi ezibholaneni lasezimoteni zekhansili ezibalethela lawo manzi.
Izakhamizi lezi zithi zitshona zisondelelene duze laduzane okulakho ukumemethekisa iCovid-19, ngalesi sikhathi idolobho leli lingelinye elikhokhelayo ekubeni lenani eliphezulu lasebebanjwe belegcikwane leli eZimbabwe.
Idamu leCriterion Buffer Dam selitshile osokuqelise udubo lwamanzi koBulawayo, ikhansili yaleli dolobho isithi iphakathi kokulungiselela ukuvula okusemthethweni ukusebenza kwemitshina yempompi eNcema Dam leFurnhill.
Inengi labantu bakoBulawayo lithi ukusilela kwamanzi kubenza babe sengozini yokuthathela imikhuhlane lula ngoba batshona besondelene duzane laduzane kungalandelwa isiqondiso sokumelana leCovid 19, eseSocial Distancing.
Bulawayo Ncema Water Works
Isakhamuzi sakoBulawayo, uNkosazana Nkosinesisa Ndlovu uchaza udubo ababhekane lalo lwamanzi.
“Asisakwazi ukuthi vele amanzi abuya nini, sesitshona silinde amanzi gapha ilanga lyasthisa sesitshona sifolele amanzi ngabe kulendlela abangasinceda ngazo ngapha leCovid lokhe imemetheka.”
UManjinela wedolobho lakoBulawayo UMnu Simela Dube uchaza isimo sedamu leMzingwane ethi idolobho selama ukumpompa amanzi asuka kilo.
“Idamu leMzingwane alisela amanzi kodwa awenhlanzi asasekhona amalevels okuthatha amanzi asephezulu kulamanzi akhona njalo akulalutho esiluvalileyo amanzi yiwo asephansi kusilinganiso sokuthi sikhe kilo amanzi.”
UManjinela Dube uqhubekele phambili echaza ukuba injini ezintsha abazifakileyo ziyavulwa kumaviki amabili.
“Kuphela yonale inyanga sikhangelele ukuba injini ezintsha esazifaka edamu leNcema leFurnhill ziqale ukusebenza ngoba lokhe zafakwa ngomnyaka ka1973 besezindala zihlala zisifa siqale lumsebenzi ngo2017 kodwa siphind saphazamiswa yiCovid kodwa sesizaqeda kubize 7,4 million.”
Idamu leCriterion lalo selitshile amanzi osekuthe kwangezelela udubo lwamanzi. UManjinela Dube uyakuchaza lokho.
“Idamu lethu leli lilakho ukugcinela amanzi okwamalanga alitshumi uma sibhekane lodubo lokuhamba kwamandla kagesti kodwa siyaqala kulibona litshile lingelamanzi kungenxa yokuguquka komumo womkhathi. Amanzi avele awasagcinwa kulelidamu asehle ahlanzwe aye ebantwini asisenelisi ukulisebenzisa ukuba lisigcinele amanzi.”
Emizameni yokulungisisa udubo lwamanzi, kunyanga ezimbili ezedluleyo uMongameli Emmerson Mnangagwa ubelomhlangano lamakhansila akoBulawayo baphuma lendlela yokwenza ukuba ikhansili itholise izakhamizi amanzi.
Kunyanga ezedluleyo uhulumende uphe idolobho imali yokulungisa izibholane ezifileyo ezeNyamaNdlovu ukuze kuphungulwe udubo lwamanzi lona osoluleminyaka lokhe lusehlula ukuphela njalo ikhansili isisenelisa ukuthola amanzi kulezizibholane kodwa lawo kawenelisi ukunathisa leli dolobho lisuthiseka ngakhoke udubo lwamanzi lokhe luqhubekela phambili.
Your browser doesn’t support HTML5
Udaba lodubo lwamanzi koBulawayo siluphiwa nguAnnahstacia Ndlovu