Ukhetho lokudinga abazamela ibandla le Zanu PF kukhetho, ama primaries, ludluliselwa phambili ukuze lwenziwe ngoMvulo kulandela ukuphuze ukuqala Sonto.
Kwezinye izigaba kubikwa iziphathamandla zebandla leZanu PF ezicatshangelwa ukuthi zazisekela owayengumongameli, uMnu. Robert Mugabe zihle zalelwa ukuncintisa.
Kubikwa lolukhetho lwehlule ukuqala ngesikhathi endaweni zonke zelizwe ngemva kokuba ugwalo lwamagama alabo ababhalisa ukuvota, ivoter’s role, ingethulwanga ngesikhathi ngoba inkampani eyanikezwa umsebenzi wokuwadhinda lolugwalo, iJongwe Printers, iphuzile ukuqeda umsebenzi ngesikhathi.
Inengi labantu livukele ukuya kulezondawo zokuvhotela ngesikhathi esabekwayo sehola lesikhombisa ekuseni, kodwa lathola lokhe kungakalungi.
Abanye balaba bantu bahle bakhalala, kuthi ababuyileyo labo bebehlangana lenkinga ezimbalwa okubalisa ukuswelakala kwamagama abo ku voter’s role kanye lokuba kulethwe amavoter’s akudala kwezinye indawo.
Umkhokheli wohlangothi lwezokukhankaselwa kwebandla kuzulu ukuba alivotele – u Political Commissar, ongathandanga ukuthatshwa amazwi, uRetired Lieutenant General Engelbert Rugeje uthi baphoxwe yinkampani ye Jongwe Printers.
U Rugeje uthi iziphathamandla zalenkampani azibatshelanga qiniso lapho sekulenkinga.
Kodwa omunye wabafisa ukuncintisa ukhetho lwamalunga edale lephalamende, emele ibandla le Zanu Pf emzini we Sunningdale, unkosikazi Irene Musarurwa, uthi kukhona okutshaya amanzi.
UMusarurwa uthi kunengi amalunga ebandla le Zanu PF akhala ngakho okuzabangela ukulahlekelwa ngama voti nxa inkokheli ingasalungisisanga.
Ngesikhathi loludaba lubhalwa ,umsebenzi wokuvota ubuqhubekela phambili njalo ababona ngokhetho, ama Presiding Officers, akhulumisane lalumsakazo athi balethemba lokuthi lolukhetho luzazaqutshwa kuhle.
Kusobala ukuba inengi lendawo zokuvotelwa azisoze zenelise ukugqiba lumsebenzi namhla ngoba kulenkulungwane zamalunga ebandla le Zanu PF afuna ukungena kulolukhetho.
Your browser doesn’t support HTML5
Udaba Silethulelwa nguMavis Gama