Amapholisa asexwayise uzulu kanye labosomabhizimusi ukuthi bengagcini imali enengi ezindlini kulandela ukubanjwa inkunzi komunye usomabhizimusi weHarare, othathelwe iUS$45,000 emoteni ngoMvulo.
Usomabhizimusi lo wakhonjelwa ngombhobho yizigebengu eserobhodini, zasezimhudula zamjikela phandle kwemota zahluthuna limali zanyamalala, kubike isikhulumeli samapholisa uMnu Paul Nyathi.
Ubugebengu obunje lobokugqekeza ezindlini sobubhahile kakhulu eZimbabwe kulezinsuku.
Inengi lithi okudanisayo yikuthi amasotsha, ayiwo amele avikele umphakathi lawo ayaphatheka kubugebengu lobu.
Kubotshwe amasotsha amabili kuliviki phezu kwecala lokugqekeza kwenye indlu eHarare kanye lokubulala umuntu oyedwa kuleyondlu.
Ohlaziya ezombusazwe uMnu Effie Dlela Ncube utshele iStudio 7 ukuthi lanxa kungamelanga abantu bagcine imali ezindlini, akukho abangakwenza ngoba besesaba ukuthi emabhanga ilakho ukudliwa nguhulumende njengalokhu osokuke kwenzakala.
Your browser doesn’t support HTML5
Ingxoxo loMnu Effie Dlela Ncube