Ukulwisana kubandla leMDC Renewal phakathi kukaMnu Tendai Biti loMnu Elton Mangoma sokutshiye abasekeli balelibandla bedanile besithi ibandla leli lilakho ukudabuka phakathi, osokuyimvama kubandla leMDC, lona eselixezuke laba zinhlangotho ezintathu.
UMangoma loBiti babanga ubukhokheli bebandla, okuyinto enqabele ukumanyana kweMDC Renewal leMDC ekhokhelwa nguMnu Welshman Ncube.
Ukulwisana lokhu sokutshiye inengi lizibuza ukuthi kambe abamabandla aphikisayo laba bazimisele ngokuqotho ukusebenzela uzulu ekulwisaneni lombuso weZanu PF na kumbe abakufunayo yizikhundla eziphezulu nje.
Amacele eMDC eqhubeka ebhidlika nje, kulamanye amabandla amatsha ahlumayo afana leZimFirst Party ekhokhelwa nguMnu Maxwell Shumba leTransform Zimbabwe ekhokhelwa nguMnu Jacob Ngarivhume.
Kodwa uzulu uthi okudingakalayo ngumanyano oqinileyo ozasusa iZanu PF embusweni, hatshi amabandla amanenginengi la alabakhokheli abakhanya bejonge izikhundla kakhulu.
Ukuhlaziya loludaba sixhume isiphathamandla seZanu PF uMnu David Ndlovu loMnu Edwin Ndlovu owebandla leMDC Renewal.
Siqale ngokubuza uMnu David Ndlovu ukuthi uthini ngokwenzakalayo kumabandla aphikisayo.
Your browser doesn’t support HTML5
Ingxoxo loMnu David Ndlovu loMnu Edwin Ndlovu