Abasakhulayo bathi ukubhidlika komnotho lokuzamazama kwezombusazwe sokuphazamise ikusasa labo ngoba sebetshona bezulazula bengajonge lutho ngenxa yokuswelakala kwemisebenzi.
Bathi uhulumende kaMongameli Mugabe sokumele avume ukuthi seyehlulekile ukubusa kuhle kanye lokusungula imisebenzi ayithembisa abantu ngesikhathi ekhankasela ukhetho.
Abanengi bathi uhulumende kumele akhulumisane lamabandla aphikisayo lozulu weZimbabwe nje jikelele kudingwe amaqhinga okuvuselela umnotho ilizwe libuye lime njalo ngezinyawo.
"Abatsha abanengi kabasasebenzi, sebephila impilo enzima kakhulu," kutsho isiphathamandla seZapu kugatsha lwabasakhulayo uMnu Ndodana Moyo.
"Sebesenza izinto ezingalunganga ezigoqela ukuthenga kumbe ukuthengisa imidakamizwa ukuze bazilibazise.
"Siyananzelela njalo ukuthi amacala ayanda kubangelwa yikuthi abasakhulayo kabasebenzi. Abanye odadewethu bacina sebethengisa imizimba," kugcizelele uMoyo.
Your browser doesn’t support HTML5
Ingxoxo loMnu Ndodana Moyo