Kubonakala kusiba nzima kubandla elibusayo kweleBotswana, ele Botswana Democratic Party, ngesikhathi ukubalwa kwamavoti kuqhubeka kulandela ukhetho oluqhutshwe ngoLwesithathu.
Umanyano wamabandla aphikisayo, oweUmbrella for Democratic Change usendleleni yokubumba uhulumende olandelayo uma kukhangelwa impumela esiyethulelwe uzulu.
I-BDP yilo lodwa iqembu eselibuse eleBotswana selokhe ilizwe lathola uzibuse kweleBhilithani ngomnyaka ka1966. Kodwa kukhanya umbuso walo usungatshabalala kumbe uxege okumangalisayo kulandela ukhetho lokudinga uhulumende omutsha oluqhutshwe ngoLwesithathu.
Impumela esikhona itshengisa ukuthi ibandla leUDC lithethe izihlalo zekhansili ezidlula okungamatshumi ayisithupha ekhulwini, noma nje eyinye impumela ibingakethulwa ngesikhathi sokuya emoyeni,
Kudale lephalamende, iUDC ibikhangelelwe ukuthi inqobe kundawo ezingamatshumi amahlanu, ukubalwa kwezinye kusaqhubeka, okutsho ilakho ukwengeza izihlalo zayo. Ukuthi ibandla libuse, lidinga izihlalo zamalunga edale lephalamende ezingamatshumi amathathu lanye (31).
Ibandla leBDP belisilela endaweni ezinengi, kwezinye liphume lingelesithathu ngemva kwelinye eliphikisayo eleBotswana Congress Party.
Imizamo yokukhuluma lesikhulumi seBDP phezu kwempumela esikhona iyehlule ibandla leli lisithi lisalinde ukuthi libone ukuthi kuzahamba njani kusiyaphela ilanga.
Kusenjalo, abanye abeZimbabwe abahlala kweleBotswana bathi nomanje kade sebejayele ibandla elilodwa eleBDP abalavalo noma kungangena elephikisayo. UMnunzana Ntokozo Thebe utsho umbono wakhe phezu kwempumela eyethulwe lamuhla.
“Kufuna ukuhamba nxele ngoba vele amabandla aphikisayo asetshilo ukuthi azabopha lapha la laphayana ngabokuza. Nxa eleBDP lingadliwa kungani kuzabanzimanyana sikhangele esigabeni sokusebenza.”
Kodwa uThebe uthi kungaba ngumnyama ongelampisi ngoba inengi layethuka ngesikhathi kungena owayengumongameli, uMnunzana Ian Khama.
“Abantu babengahlalisekanga ngesikhathi sika Ian Khama kodwa kwacina sekulungile.Vele akulalizwe elingamuntu wokuza ngitsho lele Melika liyamukela abokuza. Asingethukini uma sisesimeni esikahle ngamaphepha.”
Ngaphansi kombuso kaMasisi, ukugijimisana labaphila kweleBotswana besekwehlile, njalo ubezame ukwelula isandla ukuthi abeZimbabwe bangene besebenzisa izithupha. Kodwa wonke lamanyathela achothozwa kakhulu ngabamabandla aphikisayo.
Omunye oweZimbabwe uMnunzana Mkhululi Moyo uthi basabukela ukuthi ukhetho luhamba njani bengazi ukuthi ikusasa imumetheni.
“Kukhanya amabandla aphikisayo ahamba phambili. Ukhetho luqhutshwa kahle sizalinda sibone ukuthi kuhamba njani. Asazi kodwa ukuthi kusiyatshona ilanga kuyabe kunjani."
Kusenjalo, ocubungula ngezombusazwe esekolotshini leUniversity of Botswana, uSikwicamfundo Zibani Maundeni, uthi inkohlakalo, ukuswelakala kwemisebenzi ngokunye okuhamba phambili okungabe kudale ukuthi abantu bengavoteli iBDP ngobunengi.
“Inkohlakalo iphezulu kakhulu. Lokhe kwaqhamuka umkhuhlane we covid, icorruption isiphezulu okumangalisayo okudale ukuthi isikhwama sikahulumende sisale singelamali.”
Inhlanganiso eqhuba ukhetho kweleBotswana eyeIndependent Electoral Commission ithi ikhangele ukukhipha impumela ngokupheleleyo kusasa. Ngaphansi kwesisekelo sombuso, ibandla elilamalunga edale lephalamende amanengi yilo elikhetha umongameli welizwe.
SEE ALSO:
Udaba Esilwethulelwe NguMqondisi Dube