Lanxa abantu abanengi bekhala ngokuthi umangoye uselala eziko, uMongameli Emmerson Mnangagwa uthi akulamuntu ozakufa ngendlala lonyaka ngoba uhulumende wakhe uqhuba inhlelo zokwabela abalambayo ukudla.
UMnangagwa wethula amazwi la ngoLwesithathu ngesikhathi evula inkampani egaya impuphu eyeChampion Foods Milling eHarare.
EleZimbabwe liphakathi kwendlala emangalisayo, njalo abantu abayizigidi phose ezintathu, 2.7 million kusiya kwezintathu ezilengxenye, 3.5 milion, ikakhulu emaphandleni badinga usizo lokudla okuphuthumayo.
Lanxa inhlanganiso ezizimeleyo ezifana leWorld Food Program (WFP) leUSAID zisabela abantu ukudla kwezinye indawo zibambisane laye lohulumende, abanengi bathi akukabafinyeleli lokhu kudla.
Ukhansila kaWard 18 eDete uMnu Stanley Torima utshele iStudio 7 ukuthi esigabeni sakhe akulamuntu othola ukudla lokhu. Uthi njalo olunye udubo ababhekane lalo ngolwamanzi.
Your browser doesn’t support HTML5
Ingxoxo loMnu Stanley Torima