Inkampani yamabhasi kahulumende eyeZupco isiyehlise imbhadalo eyikhuphule kumaviki amabili edluleyo.
Le yinto ebisibangela ukuthi abantu baminyane ezimoteni ezithwala uzulu ngaphandle komthetho kungalandelwa iziqondiso zeCovid-19.
Imbhadalo yomango wamakhilomitha asuka kwelilodwa esiya kwangamatshumi amabili ebibiza Z$60 emabhasini yehle yaya kuZ$40, kuthi imbhadalo yamakhilomitha angamatshumi amabili lanye, 21km kusiya kumakhilimitha angamatshumi amathathu, 30km, ebiyiZ$90 yehle yaya kuZ$60.
Umango osukela kumakhilomitha angamatshumi amathathu lanye, 31km, kusiya kwangamatshumi amane, 40km, obubiza Z$110 usubiza Z$80.
Amakhombi asebenza leZupco wona ehlise imbhadalo yamakhilomitha afika kwangamatshumi amabili, 20km, isuka kuZ$80 yaya kuZ$60. Amakhilomitha afika kumatshumi amathathu wona asebiza Z$80.
Uzulu wakoBulawayo wamukele lokhu ngembono etshiyeneyo abanye besithi okumqoka okudingakalayo yikuthi kube lezimota ezinengi ezithwala abantu ukuze bengaminyani emabhasini eZupco, bacine bethelelana umkhuhlane weCovid-19.
Omunye olombono lo yisiphathamandla senhlanganiso elwela amalungelo abathengi eyeNational Consumer Rights Association uMnu Effie Dlela Ncube.
"Lakhathesi isadula, kumele yehliswe limali kukhangelwe ukuthi abantu bayayenelisa na?” kutsho uMnu Ncube.
Uqhubeke wathi kuzakubanzima ukuba abantu bengaminyani ngesikhathi se-lockdown ngoba abafaka imithetho yakhona labo bengayilandeli.
"Kuqakathekile ukuba abatshaya umthetho bawulandele bangayitshayi bayibeke eceleni. Kodwa esikubonanjalo nje, uyathola ukuthi liyavalwa ilizwe kuthiwe kuleCovid-19 lockdown kodwa uthole ababusayo bengakulandeli lokho bebuthanisa abantu; sikubona sonke isikhathi,” uqhubeke etsho uNcube.
Isikhulumi sekhansili yakoBulawayo, uNkosikazi Nesisa Mpofu, ukhuthaze uzulu ukuba ayehlaba ijekiseni yokuvikela iCovid-19 njalo alandele iziqondiso ze-lockdown.
Uthe: "Okuqakathekileyo yikuba abantu bayehlaba, balandele zonke iziqondiso ze-lockdown njalo bagqoke kuhle ama-mask."
Amazwi kaMaMpofu agcizelelwe ngumqondisi wesibhedlela seMpilo uSikhwicamfundo Solwayo Ngwenya, yena oxwayise abantu ukuthi bengaminyani emabhasini lakuzo zonke indawo.
"Lumkhuhlane mubi, usubuya ngobubi, usubulala okwamagama lingalaleli abalitshelela eceleni,” kuxwayise uNgwenya.
“Kumele ezimfeni kuhambe abantu abalutshwana, izihlobo kuphela njalo likhale likhatshana. Emadolobheni abantu abalaleli lokhe beminyezelana.”
Uhulumende uvimbe ukusebenza kwamakhombi nyakenye wethula umthetho ophoqa amakhombi afuna ukutshovisa ukuthi asebenze ephansi kweZupco, okuyinto edale ukusilela kwezimota ezithwala uzulu.
Your browser doesn’t support HTML5
Udaba Siluphiwa nguAnnahstacia Ndlovu