Abamabandla aphikisayo kanye lozulu jikelele weZimbabwe balemibono ehlukeneyo phezu kokuphuma egcekeni kowayengumsekeli kamongameli welizwe unkosikazi Joice Mujuru ukuba usekhokhela ibandla eliphikisayo ele People First.
Umkhokheli wenhlanganiso yabasakhulayo ye Youth Advocacy for Reform and Democracy ( YARD ), umnumzana Themba Mliswa uthi kuzokuba nzima ukuba amukelwe nguzulu unkosikazi Joice Mujuru, ngenxa yembali yakhe yokuba esebenze okwesikhathi eside ekubandla le Zanu PF, litshaphaza umnotho.
"Imibuzo izokubuzwa yilabo abavotayo,abantu bazofuna ukuba kwazi,loludaba ngolobuqotho,ludaba oselubulale ilizwe.Kunzima,mina sengakubona,ngabe benza njengami ngoba sengakubona,kunzima ukwamukelwa nguzulu wena wake waba kubandla leZanu PF. Balobuhwaba laba bantu,bebekumbuso munye okweminyaka eyedlula engamatshumi amathathu,kuyini okutsha abangakwenza. Munye kuphela umuntu oqotho ongama kuzulu njalo engowaphuma ebandleni leZanu Pf,ngumnumzana Simba Makoni,yikuthi nje wenza lokho ngesikhathi esingayisiso,kodwa uqotho".
Umnumzana Jeffery Moyo,intathelizindaba esebenza izimele, uthi lanxa lincomeka inyathelo elithethwe ngunkosikazi Mujuru, akaboni esemukelwa nguzulu, ngoba embona njengomunye walabo abekade bekuhulumende kamongameli Mugabe, sonke lesi sikhathi, bengamkhuzi lapho ebangela ukutshabalala komnotho welizwe kanye lakho konke okwenze impilo kazulu ibe nzima.
"Lithuba elihle,kuyena uMujuru,kodwa kuzizalwane zeZimbabwe kuzakuba le confusion ukuba benze kanjani,ngoba laba abantu abaphuma kuZanu PFngabantu abayiZanu PF enhliziyweni yabo. Sizakuba lenkinga yokuthi indaba ye corruption izokuya phambili nxa bengavunyelwa ukuba babuse futhi abantu beZanu PF laba,ngoba i People First yi Zanu PF".
Wengeza uMoyo ethi bekumele ngaye wenza lokho engakaxotshwa hatshi ngoba kungasekho ngenye indlela ngoba esexotshiwe ebandleni akhulela kilo leZanu PF.
"Ma bekuzahambelana lami,ngibe ngingafisa sibili ukuthi kube ngabanye abantu abangazake bangaphumi kuZanu Pf.Ngoba kasisoze sibathembe laba bantu abanje ngabo Bright Matonga,abantu abanje ngo Rugare Gumbo,abantu abanje ngo Bhasikithi laye uMujuru ukuthi kanti bazasilethelani lapha eZimbabwe,okutsha abazasilethela khona yikuphi ngoba laba bantu bafunda okunengi,bafunda ukuncindezela abantu,njalo bezakuya phambili bencindezela abantu ngemfundiso abayithola kuMugabe".
Bakhona abalemibono ehlukeneyo okubalisa omunye wengcwethi kwezombusazwe, umnumzana Mlondolozi Ndlovu ochaze inyathelo likankosikazi Mujuru njengokuhlakanipha, ukuphuma egcekeni ngalesi sikhathi lapho ibandla leZanu PF selizintshaka, kulwiwa kokuphela.
"Njalo,kutshengisela ukubana uJoice Mujuru, ungumuntu, ngezinye indlela singathi okhaliphileyo ngoba sibona ngomumo wokwenzakala kwezinto,kazange amelele isikhathi esedlulileyo ukuba akhulume ukuba ufuna ukwenzani kodwa umelelele isikhathi esifaneleyo. Khathesi nxa kulengxabangxoza kunje,bayalwisana bafuna ukukhiphana,oMunangagwa labo Grace Mugabe,uMunangagwa,i team Lacoste leyo ayitshoyo ukubana hayi,kabeke lokho abakwenzayo.Kutsho ukuthi umelele isikhathi esifaneleyo. Kutsho ukuthi isikhathi sakhe abesilindele sesifikile,kutsho ukuba uselungisele ukuba alwisane labo,ukuthatha isikhundla ngo 2018".
Uzulu ezamamukela uMujuru, lanxa elembali kubandla le Zanu PF okweminyaka yonke le uNdlovu ethi ngoba esazi ukuthi yena ubevele engofuna kube lenguquko elizweni kunhlangothi zonke okubalisa lakwezokhetho.
"Engenelisa ukuba akhulume labantu,njalo njengomuntu oyazakalayo emaphandleni kakhulu,lokhuya obekusehlulekwa ngabe MDC,angakwanisa ukuba akhonnvinse abantu ukubana hayi,sengibuye lebandla elitsha.Njalo uMai Mujuru ungomunye walabao abalwela ilizwe,inkululeko. Siyezwa ukuba abebutho bayatsho eminyakeni edluleyo ukuba akula muntu ongalwanga impi ongalibusa leli lizwe. Yena uyabuya njalo lakhonokuyana ,laloluyana uluhlu entweni azilethayo ukubana hayi lami ngingomunye wabalwa impi,nanku engibuya lakho ukubana ilizwe likhululeke embusweni kaMugabe. So ngokubona kwami,engenelisa,asazi njalo ukuba,kuzokwenzela into ezinengi,njengoba singakafiki u 2018,kodwa ngokubona kwami uzakuba ngomunye ozahlupha ukuthatha isikhundla sikamongameli Mugabe".
Libhaliswe okusemthethweni ngoLwesihlanu olwedluleyo, lelibandla eliphikisayo lihamba ngegama lokuthi People First kunhlanganiso ebona ngezokuqhutshwa kokhetho olwe Zimbabwe Electoral Commission.
Abebandla leli bathembise ukuba ingasoze iphele liviki bengakalethuleli kuzulu lelibandla, elibunjwa ngamalunga amanengi axotshwa ebandleni leZanu Pf bebekwa umlandu wokufuna ukuvukela umongameli Robert Mugabe kanye lokuba bebefuna ukumbulala ngazo zonke indlela okubalisa ubuthakathi.
Osekumangalisa uzulu yikuba, betheswa umlandu ofanayo lalabo asebexotshwa njalo khathesi kungxabangxoza yokubanga izikhundla esebandleni leZanu PF, eselizintshaka, sekulamaxuku angapheliyo, kubangwa ubukhosi lokuthi ngubani ozakwelama uMugabe lapho esesukile esikhundleni sobukhokheli.
Your browser doesn’t support HTML5
Udaba lokwamukelwa ngemibono etshiyeneyo kwebandla lePeople First