Kwezempilakahle namuhla sixoxa ngomkhuhlane wamathambo owe-arthritis obonakala ngokuvuvuka kwamadolo, inqagala kumbe inqulu.
Ukuvuvuka lokhu kuvame ukuhambelana lokubabomnvana kanye lobuhlungu ezithweni lezo zomzimba. Amadokotela alakho ukuhlola isimo lesi esebenzisa imitshina yama x-ray, ultrasound scan kumbe iCT scan ukuze bebone okwenzakalayo phakathi kwamalunga la okulezibonakaliso lezi. UDokotela Gibson Matindi, ingcwethi kwezamathambo, uchasisa ngomkhuhlane lo.
“ I-Osteoarthritis ihlasela kakhulu amajoyini agonjolozelwe lithambo elibutshelezi, njalo kuvame ezandleni, emadolweni, umgogodla kanye lenqulwini. Izibonakaliso ziyatshiyana njalo zigoqela ubuhlungu, ukubopha kwama joy ini kwabanye njalo kube lokuvuvuka. Lokhu kubangela ukuthi umuntu ehluleke ukwenza imisebenzi ayijayeleyo ngenxa yobuhlungu, ukuvuvuka kumbe ukwehluleka ukusebenzisa amajoyini la.”
Uqhubekela phambili uDokotela Matindi ekhuluma ngemizamo abayenzayo esibhedlela ukuze isigulane senelise ukuphila lomkhuhlane lo.
“Ukwelapha i Athritis kugoqela ,okokuqala, ukuguqula impilo Nxa kungehlula sekuzaqala ke imithi yokuthundubeza ubuhlungu. Amaphilisi okuthundubeza ubuhlungu awamisi ukuqhubeka komkhuhlane lo kodwa enza kuphileke ngcono. Ekucineni komkhuhlane Lo yikho okudingenga ukuthi kube lokuya khitshwa lowo mathambo kufakwe okokwenziwa ukwenzela ukuthi isigulane sizwe ngcono.”
Umongi uNkosikazi Sithandazile Gumede uchasisa okungenziwa ukuze kwenqabelwe umkhuhlane wamathambo.
“Singawenqabela njani umkhuhlane lowu owe arthritis, okwakuqala yikuthi umuntu abone ukuba kabi lomzimba omkhulu kakhulu ozasinda amathambo akhe. Njalo ungadli izinto eziletshukela elinengi, kulabo abavele belomkhuhlane wetshukela kumele bayi controller ngoba itshukela elinengi lilakho ukudala ukugugudeka kwamathambo. Abantu kabenze ama exercise ukuze umzimba wabo uhlale uqinile. Sikhuthaze njalo ukuba abantu bengathandi ukubhema igwayi loba ukuhlala lapho okulentuthu enengi engadala ukuba ingaphakathi ingasebenzi kahle.”
UNkosikazi Sehlule Nyathi ohlala lomuntu olomkhuhlane wamathambo ulandisa ngabahlangana lakho.
“Amajoints lawa ayavuvuka, at times uyavuvuka konke ezandleni lenyaweni lase face, imhlathi le iyavuvuka. Umuntu wakhona ukuhamba i-distance ende kakwanisi, uthi uzwa ubuhlungu engahamba i-distance ende. Engangani uyathoba athathe i-medication ayabe eyiphiwe, kuyaba ngcono.”
Amadokotela athi kunzima ukwelapha isimo lesi ngakho-ke kuqakathekile ukuba umuntu azinanzelele nxa esebenza kumbe esenza imidlalo njalo isisindo somzimba singedluleli esibangeni esisinda amathambo okubangela ukugugudeka kwamajoyini.
SEE ALSO:
Udaba Esilwethulelwe NguBathabile Masuku