Ilizwe leMelika ngoMgqibelo lenze isikhumbuzo sokubhidlizwa kwezakhiwo ngamalwecatsha mhlaka 11 ngoMpandula ngomnyaka ka2001.
UMongameli Joseph Biden ubekhokhela imicimbi eyenziwe kwele Melika ngesikhathi kulabanye abantu abathi amalwecatsha alakho ukwenza okufanayo elizweni leli.
Umcimbi wakuqala wenzelwe okwakulesakhiwo seWorld Trade Center obekulomongameli Joseph Biden, labake bakhokhela ilizwe leMelika abagoqela uMnu. Barack Obama loMnu. Bill Clinton, njalo lezihlobo zabantu abafela endaweni le.
Amalwecatsha asebenzisa indizamtshina ezimbili ekubhidlizeni iWorld Trade Center. Bekubalwa amagama abantu abatshabalala eWorld Trade Center.
Loba uBiden engethulanga umbiko wakhe namuhla endaweni le, ukhulume kumabonakude awuphanyeke enkundleni yokuxhumana eyeFacebook kukhasi leWhite House. Uthe abantu kumele bamanyane ukwenzela ukunqoba izitha.
Abantu abafika phose inkulungwane ezintathu babhubha kulandela isehlakalo lesi esenzA eleMelika livuse impi emazweni agoqela eleIraq lele Afghanistan lapho okwakudingwa khona amalwecatsha eAl-Qaeda ayekhokhelwa nguBin Laden.
Bakhona abasekela okwethulwe nguBiden kubelabanye njalo abathi kumele eleMelika liguqule indlela elidlelana lamanye amazwe ukuze kube lokuthula elizweni. Omunye wabalombono lo nguMnu. Bernard Bhekilizwe Ndlovu, ingcwethi yezombusazwe ezimeleyo.
Lokhu kusekelwa nguMnu. Busani Mbuso Ntini, odabuka eZimbabwe ohlala eNew York, othi akwaziwa okungenziwa ngamalwecatsha kwele Melika.
UMnu. Den Moyo, laye odabuka eZimbabwe ohlala eMelika, uthi kumele abantu balwisane lamalwecatsha alakho ukudala umona emazweni atshiyeneyo.
Your browser doesn’t support HTML5
Kwenziwa Isikhumbuzo Sababulawa Ngamalwecatsha Asebenzisa Indizamtshina Kwele Melika
Amalwecatsha abhidliza iWorld Trade Center, atshaya njalo isigodlo samabutho esePentagon kwathi indizamtshina okwakumele iyebhidliza iWhite House yawela ePennyslvania.