Isiphathamandla seqembu lomdlalo wenguqu eleHighlanders uSihlangu Dlodlo uthi bayalusekela uhlelo oluqoqwa ngabalandeli olokukhalala ukubukela umdlalo ozakuba enkundleni yeBarbourfields ngeSonto.
UDlodlo uthi kuzakuba yinyama yembongolo khetha omthandayo ngeSonto lapho abanye abalandeli beqembu leHighlanders abaqoqe ukuba bayebuthana endaweni yokuzithokozisa eyeHighlanders Clubhouse kulokuba babukele umdlalo ozakuba phakathi kwaleliqembu leleZPC Kariba.
"Ku marketing okusemqoka yikuba lokho okuthengiswayo kuyabangisana kuhahabela labo abathengayo. Kulabalandeli beqembu leHighlanders abaqoqa umcimbi wabo ngasikhathi sinye kulomcimbi oqoqwa yiPSL. Thina njengeHighlanders sisekela yomibili limcimbi njalo sizaphatheka kuyo yomibili ndawonye lokwazisa uzulu ngayo. Ukuba abathengi bona bazakuya ngaphi kuzabonakala ngosuku lwakhona," kuphawula uDlodlo.
Inkuthazo yokuba abalandeli beqembu leHighlanders bekhalale ukuya enkundleni iqale ngemva kokuba iqembu leli kuthiwe kumele lihlawule inkulungwane eziyisithupha zamadollar eMelika – US$6,000 ngemva kokuba umdlalo walo owenkezo yeChibuku leleSimba Bhora ungasafikanga emaphethelweni kunyanga eyedluleyo.
Umlandeli weBosso uBeatrice Mpofu uthi lokhu bakwenza ngoba bekhathele ukucindezelwa okwenziwa iqembu labo abalithandayo.
"Ngithi mina asingayini eBF ngeSonto. Sikhathele ngokuqilibezelwa ngonompembe. Lapha eZimbabwe akulaqembu elilabalandeli abanengi njengeHighlanders yikho sifuna bakubone ukuthi siqakatheke njani belingisise amaphutha abo ikakhulu kubonompembe abazenzela umathanda abatshaya abakufunayo," kutsho okaMpofu.
Omunye njalo umlandeli weqembu leHighlanders uBlessing Sweswe, laye uthi ukubona kungcono ukuba batshengisele ukukhonona kwabo ngokubuthana eClubhouse.
"Thina esikusolayo yikuba iPSL ayingasigwebi ngoba singekaMthwakazi yikho ke abantu asambeni eclubhouse siyezikwejisela sinike iqembu imali lenelise ukubhadala izigwebo zalo. Okusalayo abePSL labe ZIFA imali bazabe bengayitholanga," kutsho uSweswe.
Umsekeli wembu leDynamos uBernard Chimutsotso uthi laye uvumelana lenyathelo leli elifuna ukuthathwa ngabalandeli beqembu leHighlanders.
"Kulungile lokhu okwenziwa ngabalandeli beqembu leHighlanders ngoba kabazilungiseli bona bodwa kodwa balungisela ngitsho lasibi sethu abeDynamos. Emdlalweni esiwudlale leHerentals umdlali wethu watshaywa ngendololwane kodwa unompembe akazange ajezise lowo owamtshayayo. Sonke sikhala ngabo onompembe njalo ngeSonto kabangayi enkundleni, lathi kasihambi. Ngitsho loba bekungumdlalo obuphakathi kweHighlanders leDynamos besingasoze sihambe," kutsho uChimutsotso.
Umkhankaso lo owokuba abalandeli bakhalale ukuya enkundleni ngeSonto usulumathe wasabalala waze wafika lakwamanye amazwe njalo umgcinisihlalo wabakhokheli beqembu leHighlanders eBotswana uCephas Tshuma uthi labo bayawusekela.
"Siyenze imizamo eyokuba imali zifakwe kuOrange Money kunombolo esizazithumela. Besinxusa kodwa bonke abalandeli baye kulezondawo eFrancistown kanye laseGaberone lapho imali ezizathathelwa khona sibe sesiyiqoqa siyihambise eclubhouse. Iqembu ngelethu njalo nxa lijeziswa imali ebhadalwayo ngeyethu, yikho sithe kungcono siqoqe sincedise," kutsho uTshuma.
UPrecious Sibanda, laye ongumlandeli weqembu leHighlanders, uthi ume waxamalaza nxa ehluza loludaba lokukhalala kwabalandeli beBosso ukuya enkundleni.
"Yebo kambe iPSL isingathola imali encane ngemva kokuba sekungene abantu abalutshwane, kodwa yonaleyo mali ezatholakala eclubhouse izaphinda kube yiyo ezakuyabhadala indleko ezizakuba khona enkundleni. Phezu kwalokho labadlali bethu ngibona ngathi ukudlala enkundleni engela abalandeli kuzabaphazamisa kakhulu. Ngimbaxambili mayelana laloludaba," kutsho okaSibanda.
Banengi abalandeli beqembu leHighlanders abaloba ebulenjini beveza ukusekela kwabo ukuba kungayiwa enkundleni. Izahluko zabalandeli ezisendaweni ezehlukeneyo ezigoqela iSouth Africa Chapter lazo sezikhuphe imibiko zisitsho ukuba zivumelana lawo lumkhankaso. Kuvamile ukuba nxa iqembu leBosso lidlala abantu besuke kude lakhatshana bezolibukela leliqembu kodwa kulimpelaviki inengi labo lithi lizathumela imali kuphela.