Ingcwethi kwezempilakahle zithi kuyingozi ukunathisa abantwana abancane amafutha ngenjongo yokuvikela imikhuhlane egoqela eyesisu.
Zithi akukhethelekile ukuthi amafutha la akhudunyeziwe, kumbe hayi ngoba ayadala uqweqwe phezu kwamaphaphu, okubangela ukuthi kubenzima ukuba umoya udlule nxa umntwana ephefumula kuze kudinge ukuthi ahlinzwe, kugeziswe, okungabangela ukulahlekelwa yimpilo.
Udokotela Mbonisi Dube uchasisa ngokuqakatheka kokumunyisa abantwana okwenyanga eziyisithupha kungekho okunye abakuphiwayo.
“Kulomlayezo esihlala siwunika omama nxa bezithwele loba sebebelethile, umntwana omcane akaphiwa lutho aze ayekwanisa 6 months ngaphandle kwebele likamama kuyenzelwa ukuthi sivikele abantwana emkhuhlaneni. Uchago lukamama lusoft and smooth alulimazi amathumbu omtwana, umama nxa elegcikwane leHIV nxa engayenza I exclusive breastfeeding kuyayehlisa amathuba okuthi athelele umtanakhe ngakho umtwana nxa esephiwa amafutha kuyayenza acine amathuba amagcikwane.”
Udokotela Dube uqhubeka echasisa ngengozi ekhona ekunikeni abantwana amafutha lokunye ngekhaya kungela silinganiso esiqondileyo.
“Ingozi yokunika umtwana amafutha, amafutha ukuze egayiseke esiswini afuna ama enzymes le bile enengi umtwana uyabe esamcane engaphiwa izinto ezinjalo kuyenza ukuthi isusu sakhe sibe lepressure yokwenza ama acids amanengi awokugayisa amafutha akhona so yikho singakukhuthazi ukuthi umtwana aphiwe amafutha or any home remedies. Ama remedies angekhaya ingozi yawo yikuthi awabi ledosage into ezinjengamaphilizi ungabona umtwana ephiwa esibhedlela lanxa eku exclusive breastfeeding ziyabe ziledosage esikwenza ngekhaya akula dosage umtwana uyaphombu kuphiwa isilinganiso sezwa ngumama womtwana.”
UNkosikazi Nothabo Ncube, isakhamuzi sakoBulawayo uchasisa isizatho sokunathisa abantwana amafutha.
“Icooking oil ukuthi siyinathise abantwana kuyenzeka kwesinye isikhathi uyabe elodenda esehluleka ukuphefumula ukuthi enganatha icooking oil udeda lwehle luphume esesiya ngaphandle lanxa ekhwehlela evaleka. Asimnathisi eqandayo simnathisa ukhudumalayo ngetea spoon.”
UNkosikazi Margaret Msipha, olosana uthi ubejwayele ukulunathisa amafutha kodwa usesesaba ngemva kokufundiswa ngengozi ekhona.
“Esikhathini esinengi abantwana abancane bayabe betshilwa ucine ungakwazi ukuthi kuyini okungamsiza sincine sikhudumeza ogogo basitshela ukuthi I cooking oil egudumalayo iyasiza kakhulu yiyo ababeyisebenzisa kudala yikho okwenza lathi siyibenzise ngoba umtwana uyabe etshilwa abengcono nxa sesimnathisile .Ngokufunda esikutshelwa ngabezempilakahle ingozi ekhona sesisesaba ngoba kubuhlungu ukulahlekelwa ngumtwana.”
Ugogo Nomathemba Sithole isakhamuzi sakoBulawayo eNketa uthi kuyini osokwatshintshayo ngoba ababo abantwana bakhule benathiswa amafutha nxa bephathekile esiswini njalo belokunye okuhluphayo.
“Thina abantwabethu bakhula ngayo I cooking oil manje okwakhathesi asikwazi ukuthi sokwatshintshani ngoba sesitshelwa ukuthi iyingozi lokuthi abantwana bazasizwa yini asisakwazi. Kanti okwatshintshayo ngumhlobo we cooking oil kumbe ngokunye ngoba khathesi onina babantwana sebesala nxa usithi uyamnathisa cooking oil umntwana sekungathi usumbulala ikanti thina sikwazi isiza kakhulu entweni ezinengi indlebe besithela I cooking on nxa zibuhlungu kanye lokunathisa nxa umtwana etshilwa kumbe esongelwe.”
Inhlanganiso yePaediatric Association of Zimbabwe ekhankasesela impilakahle yabantwana, ithi icooking oil akumelanga isetshenziswe ebantwaneni.
Ithi iLipoid pneumonia ngumkhuhlane wamaphaphu obangelwa ngamafutha, njalo abantwana abayisilinganiso sokulitshumi lasikhombisa ekhulwini -70% sebengaba lowesisu owe-gastroesophageal reflux disorder. Umkhuhlane lo ubikwa unzima ukwelapheka njalo ungabangela ukulahlekelwa yimpilo.
SEE ALSO:
Udaba Esilwethulelwe NguBathabile Masuku