Elinye icele lenhlanganiso yabalwa impi yenkululeko eyeZimbabwe National Liberation War Veterans Association ithi abemukeli ukhetho olusanda kuqhutshwa licele ebelikhokhelwa nguMnu. Chris Mutsvangwa.
Kukhetho oluqhutshwe ngoMgqibelo, uMnu. Cephas Ncube ukhethwe ukuba abengumgcinisihlalo wenhlanganiso le labanye bakhe, okubikwa ukuba badlelana kakhulu lebandla leZanu PF.
Icele elikhokhelwa nguMnu. Ethan Mathibela lithi uNcube, uMutsvangwa labanye bephule isinqumo somthethwandaba esokuthi akumelanga kuqhutshwe ukhetho kungakedluli mhlaka 21 Mfumfu kuviki ezayo.
UMathibela uthi abantu laba kumele bejeziswe ngumthethwandaba. Sehlulekile ukuxhumana loNcube, uMutsvangwa labakucele lesithathu elenhlanganiso le ngoba bebengaphenduli omakhalekhukhwini.