Kuyaxokozela okumangalisayo phakathi kwebandla leMDC-T elikhokhelwa nguMnu. Douglas Mwonzora, leMDC Alliance kaMnu. Nelson Chamisa, kulandela ukumiswa kuka Chamisa nguMwonzora ukuba engasebenzisi ibizo leli.
Okunye njalo okwenza alwisane ngamandla amabandla la ngumbiko othi ibandla leMDC-T selifisa ukuxotshisa edale lephalamende lakumakhansili labo okukhanya bedlelana loChamisa.
Ibandla lika Chamisa lizondiswe njalo yikunikwa kwebandla leMDC-T nguhulumende izigidi ezifika phose amatshumi ayisithupha zamadola - $59 million, eyabelwa amabandla phansi komthetho wePolitical Parties (Finance) Act.
UMnu. Witness Dube, ophethe isikhundla sokwethulwa kwemibiko kubandla leMDC-T, uthi balelungelo lokuvimba bonke abasebenzisa ibizo leMDC Alliance okungekho emthethweni.
Kodwa uDokotela Nkululeko Sibanda, isikhulumeli sikamongameli weMDC Alliance, uthi sebephelelwe yimicabango abakubandla lika Mwonzora.
Your browser doesn’t support HTML5
Sebexabana Okumangalisayo Abakubandla leMDC Alliance leleMDC-T