Abantu abanengi bakhanya besele bebambe owangaphansi ngokukhethwa kukamnumzana Phelekezela Mphoko ukuba ngomunye wabasekeli bakamongameli Robert Mugabe ebandleni leZanu PF ngemva kukamnumzana Emmerson Mnangagwa okade evele ekhangelelwe.
Ababili laba abakhethiweyo umnumzana Emmerson Munangagwa owalwa impi yenkululeko ekuviyo lebutho ele ZANLA ngaphansi kwe Zanu PF kanye lomnumzana Phelekezela Mphoko yenake owalwa ekuviyo lebutho le ZIPRA ebekuluhlangothi lwebutho lebanda le PF Zapu.
IStudio Seven ikhulumisane lengcwethi ecubungula indaba zabalwa impi yenkululeko umnumzana Tjenesani Ntungakwa osinekeze enye yembali phezu kwabalwa impi yenkululeko okubalisa uMphoko obesaziwa ngelokuthi ngu Report ngesikhathi sempi.
UNtungakwa uthi uMphoko waba ngomunye wamalunga asungula ibutho le ZIPRA elabunjwa ngomnyaka ka 1971,ngemva kwesehlakalo se Congress of Militance.Ngaleso sikhathi inkokheli ebalisa umuyi uDr Joshua Mqabuko Nkomo, ibotshiwe,ibandla le Zapu laselisala selise zandleni zikamnumzana James Chikerema.
Kungemva kokuxabana phakathi kuka Chikerema,owayetshiyelwe ukuba ngumsekeli ka Nkomo, lo lomunmzana Jason Ziyaphapha Moyo owacina sekunguye umsekeli umkhokheli we Zapu, uChikerema esetshiye lelibandla le Zapu, wayabumba ibandla Front For Liberation Of Zimbabwe-FROLIZI ngmnyaka ka 1971.
Umphoko ubikwa kunguye njalo omunye wababona ukubunjwa kweviyo le joint Military Command phakathi kwamabandla abalisa ele Zanu Pf lele Pf Zapu, okwaba linyathelo lakuqala lokuzama ukuhlanganisa amaqembu la womabili kusukela ngomnyaka ka 1971 kusiya kumnyaka ka 1972.
Uthi abantu abafundela umsebenzi wokulwa impi yenkululeko njengomnumzana Mphoko, babefundiswa ukwenze njalo bengabalwa becatsha. Uthi kungakho inengi lingamazi kanjalo ngoba engesumuntu othanda ukukhuluma sekwamngena egazini akufundiswayo empini.
Kuthe ngokuphela kwempi yenkululeko,ilizwe selithole uzibuse,uMphoko uhle wasiwa e Russia waba ngummeli we Zimbabwe kulelo.Ube ngummeli njalo kwele Botswana le South Africa.
Umongameli Mugabe uveze ukuba sebezakugcotshwa okusemthethweni ngolweSihlanu ababili laba abakhethwe ukuba ngabasekeli bakhe.
Lokhe sisembalini kaMphoko, omunye wabasebenza laye uRetired Brigadier General Abel Mazinyane, utshele uGibbs Dube weStudio 7 ukuthi uMphoko yindoda eyayizimisele okwamagama empini ekuvuyo leZIPRA ele Zimbabwe People’s Army lalelo elamanyane lele Mkhonto weSizwe.