Sokuxotshwe amalunga angamatshumi amabili lanye edale lephalamende lawe Senate. Amane ngaweSenate kuthi alitshumi lasikhombisa engawe House of Assembly, akhethwa phansi kwebandla le MDC elikhokhelwa nguMnu. Morgan Tsvangirayi, akhetha ukuphuma kilo ayabumba ele MDC Renewal Team.
Lokhu kuza ngemva kokuba abe MDC-T bebhalele idale leli ukulazisa phezu kokuba kumele baxotshwe ngoba sebengasi malunga abo ngemva kokuhlubuka bebumba elinye ibandla.
Esethula umbiko wakhe wokubaxotsha, umlawuli wedale umnumzana Andrew Mudenda uveze ukuba uthethe lelinyathelo ngemva kwesicelo senkokheli ye MDC –T.
Wengeza uMudenda ethi amalunga la akazange aphikise okusemthethweni impumela yokwenzakala emhlanganweni omkhulu weCongress webandla le MDC-T.
Omunye wabaxotshiweyo njalo wakhethwa ngendlela ye Propotional Representation ukuba ngu Senator, unkosikazi Sekai Holland ugcaze ngokuxotshwa kwakhe.
Unkosikazi Nomathemba Ndlovu ongene njalo nge propotional Representation yabomama emela isigaba se Matebeleland South uthi bekuvele kusobala ukuthi bazaxotshwa. Uthi unkosikazi Ndlovu lalokho okubehleleyo abaxotshiweyo laba kungenxa yokwenza kwabo.
Umlawuli wedale, uMudenda wengeze ethi ngaye inhlangothi zonke zikahulumende ziwulandela umthetho ukuqhuba imisebenzi njengokwenziwa lidale lephalamende, ngabe into ziqhutshwa ngokufaneleyo.
Lokhu kusitsho ukuba sekuzamele kuyiwe kuma kukhetho lwama By – Elections ezigabeni lapho abaxotshiweyo bakhethwa nguzulu.
Nxa sekuhlanganiswa izikhundla esezikhona manje ezingela bantu ngemva kokuxotshwa njalo kwabane abe Zanu PF, sezingamatshumi amabili lanye, izigaba lapho okuzamele kuqhutshwe njalo ukhetho.
Abaxotshiweyo bagoqela:
Omnumzana Tendai Biti( Harare East ), Willus Madzimure ( Kambuzuma ) Samuel Siphepha Nkomo ( Lobengula ), Paul Madzore ( Glenview ), Gorden Moyo ( Makokoba ), Arnold Tsunga ( Chikanga Dangamvura ), Solomon Madzore ( Dzivarasekwa ), ONkosikazi Lucia Matibenga ( Kuwadzana East ) Roselyne Nkomo ( Tsholotsho North ) lo Settlement Chikwinya ( Mbizvo ).
Kuthi abangena nge Proportional Representation babalisa: Unkosikazi Evelyne Masaiti, Judith Muzhavazhe, Gladys Mathe. Kuthi edale leSenate kuxotshwe abablisa, unkosikazi Sekai Holland ( Chizhanje ), Rorana Muchihwa ( Chikomo ), Watchy Sibanda ( Matebeleland North ) lomnu. Patrick Chitaka ( Manicaland )
Your browser doesn’t support HTML5
Udaba Silethulelwa nguMavis Gama
Kunajalo nje, ibandla leMDC-T Renewal lithi lizakusa loludaba emthethwandaba ngoba lisithi ukuxotshwa kwamalunga la akukho emthethweni ngoba usomlomo wedale lephalamende, uMnu. Jacob Mudenda wake wapha isinqumo sokuba loludaba luthethwa ngumthethwandaba hatshi idale.
UChris Gande weStudio Seven uxoxe lomgcinisihlalo webandla leMDC-Renewal, uMnu. Sam Sipepa Nkomo ukuze sizwe okunengi ngaloludaba.
Your browser doesn’t support HTML5
Ingxoxo loMnu. Sam Sipepa Nkomo