Ziyavulwa izikolo ngoLwesibili kulezinye izifundi ezihlala ezikolo esezifikile ezikolo zabo njalo labanye ababalisi abathi abasoze benelise ukufundisa abantwana ngenxa yeholo eliphansi lokunye okubahluphayo
Abakunhlanganiso zababalisi ezitshiyeneyo bathi amalunga abo kawalamali yokuhamba ezikolo.
Umsekeli womgcinisihlalo wakoBulawayo kunhlanganiso emela ababalisi eyeAmalgamated Rural Teachers Association of Zimbabwe, uMnu Tinotenda Chidhakwa, uthi ababalisi abasoze baye emsebenzini njengoba iholo labo lingeneli njalo bengasela mali zokuya emsebenzini.
Umkhokheli wenhlanganiso yeProgressive Teachers Union of Zimbabwe, uSikhwicamfundo Takavafira Zhou, laye uthi ababalisi abalungiselelanga ukubuyela emsebenzini njengoba iholo labo liphansi.
Kumbiko wakhe uZhou uthe imizamo yokukhulumisana lohulumende izikolo zingakavulwa yehlule njalo basakhulumisana lababalisi ukuze bazi ukuthi bazakuya emsebenzi kumbe abasoze benelise njengoba uhulumende engakagcwalisisi izifiso zabo.
Kusenjalo, ekhuluma lentathelizindaba eseHarare, umphathintambo wezemfundo yePrimary leSecondary uMnu Tonderai Moy,o uthe izikolo akumelanga zibambe ngamandla abazali ukuthi bathenge ama-uniform njalo izifundi ezingabhadalanga amaschool fees akumelanga zixotshwe esikolo.
UMoyo uphinde wakhuluma ngodaba lwezifundo ezenziwa ngasese.
“Umthetho kahulumende usegcekeni, ama-extra lessons awakho emthethweni, awafunakali esikolo. Nxa bekhona abawenzayo ezikolo ngifuna libamangalele. Nxa umbalisi efuna ukwenza ama-extra lessons uyenelisa ukuwenza emzini wakhe hatshi esikolo. Udubo esilubonileyo ngolokuthi ababalisi besebekhangela kuphela labo ababhadale imali zama extra lesson,” kutsho uMoyo.
Abazali bathi amazwi kahulumende ngodaba lwama-extra lessons azakwengeza loludubo. Owayekhokhela inhlanganiso yeBulawayo Progressive Residents Association, uMnu Ambrose Sibindi, uthi amazwi la azakupha ababalisi igunya lokwenza santando.
USibindi usole njalo uhulumende esithi akenzi okweneleyo ekuvikeleni abazali okwenza izikolo zenze umathanda.
Izikolo zivulwa ngalesisikhathi impumela yemihloliso yeAdvanced Level isanda kuphuma njalo izifundi zipase ngesilinganiso esedlula amatshumi ayisitshiyagalo lunye lane ekhulwini, 94.,58%.
Okugcweleyo ngaloludaba: Udaba esilwethulelwe nguTaboka Ncube.