Abohlangothi lukahulumende olunakekela izifuyo lokwelatshwa kwazo, olweDepartment of Veterinary Services bathi sebevuselele ukulungiswa kwemithi lamajekiseni okuvikela imikhuhlane elizweni lonke.
Lokhu kuvele namuhla lapho kusungulwa okusemthethweni indawo yokuhlola imikhuhlane ehlasela inkomo eyeGwanda Provincial Veterinary Laboratory, ezancedisa abalimi eZansi yeMaNdebeleni ukuthi bathole uncedo olweneleyo lokuphilisa izifuyo ezigulayo.
Veterinary Laboratory in Gwanda
Lokhu kuza ngesikhathi uzulu weMaNdebeleni, ikakhulu esiqintini seInsiza, ekhala ngodubo lokufelwa zinkomo ngenxa yemikhuhlane yemikhaza.
Umqondisi weLivestock Production Systems in Zimbabwe Project, uMnu. Sikhalazo Dube, osebenzela njalo inhlanganiso yeInternational Livestock Research Institute uthi ukusungulwa komsebenzi wokulungiswa kwemithi yamaVaccine aweJanuary disease kuzadala ukuphepha kwenkomo kulesi sabelo ezife ngobunengi ngenyanga ezedlulileyo.
Omunye wabavule okusemthethweni iVeterinary Laboratory eGwanda
“Sithethe abanye babo bayamfundiswa emahofisini yethu eKenya, bayafundiswa ukwenza ivaccine yeTherilosisis eyeJanuary disease, isikhathi sonke bebesenza 20,000 ama doses kathesi benze 300,000 doses i50 ,00 yiyo oyibone lapha eprovincial lab sizasetshenziswa lapho okumemetheke khona umkhuhlane , nxa idose ihlatshiwe enkomeni yakho ibalokuvikeleka ize iyekufa.”
Ugcizelele esithi ukuvulwa kwalindawo yokuhlola izifuyo kuzancedisa kakhulu abafuyi kulesisabelo ukuze bavikele izifuyo zabo kumikhuhlane efana lodalwa yimikhaza leminye.
Veterinary Laboratory in Gwanda
“Okuqakatheke kakhulu emkhuhlaneni yikuthi masinya masinya sibekwazi umkhuhlane ophakathi kwezifuyo yiwuphi ukuze selatshwe masinya umkhuhlane ungakamemetheki ngoba ungamemetheka siyavalwa isibaya, iJanuary disease kuqakathekile ukuthi uvikelwe masinya njalo amalaboratory anjengala aqakatheke kakhulu.”
Lamazwi agcizelelwe nguNkosikazi Latino Dlamini – Maseko, umabhalane omkhulu wesabelo seMatabeleland South.
“Namuhla siyabonga ukuthi baze basilethela ilaboratory lapho esizathi khona sikhangelisise , sicubungule, sicwaninge ukuthi kuyini okubulala inkomo zethu hatshi ukuthi sihamba silokhu sisisthi yiBlack leg,sesile laboratory nxa umdala engathi ngiyazi nxa yayisenza lokhu ikhupha ulimi ibulawa yilokhu bathi letha lapha sizoyihlola siyibone.”
Veterinary Laboratory in Gwanda
UNkosikazi Sara Piccoli, umeli weEuropean Union kwele Zimbabwe, uthi bazimisele ukuncedisana leleZimbabwe kwezokulima njalo sebekhangeleli ukuthi kubelenguquko ekulondolozweni kwezifuyo.
“Esesikukhangelele yikuthi sibone inguquko ebambekayo kubalimi abazathola ulwazi abazaluphiwa kulaba kanye laloluhlelo ukuze bananzelele masinyane imikhuhlane ehlasela izifuyo zabo njalo bazivikele ngolwazi abaluphiwa ngabe veterinary.”
Inhlanganiso yomanyano wamazwe awezwekazi leEurope, eyeEuropean Union ikhiphe uncedo lwezigidi ezinhlanu zamaEuro - 5million Euros kusukela ngomnyaka ka2020 kuhlelo olweLivestock Production Systems in Zimbabwe Project.