Umthethwandaba waphezulu oweHigh Court koBulawayo usuthethe isinqumo sokuthi akukho emthethweni ukuthi uPrince Bulelani Lobhengula Khumalo agcotshwe ukuba yinkosi yaMaNdebele ngoMgqibelo.
Lokhu kutsho ukuthi akusamelanga agcotshwe kuze kubelomthetho kusesekelo sombuso welizwe ovumela ukuthi kubelenkosi kwele Zimbabwe.
Kodwa-ke ababone ngomcimbi lo bathi balakho ukuqhubekela phambili ngawo njengoba inkosi ikhethwa nguzulu hatshi uhulumende.
Abantu batshengisele phandle komthethwandaba besekela ukugcotshwa kwenkosi yaMaNdebele.
Ngesikhathi inkundla ebikhangele udaba lolu ihlezi abakade betshengisela abeMthwakazi bebejika amatshe, behlabelela beth bafuna imvumo yokungena edale kodwa bavinjwa ngamapholisa.
Amapholisa abehlome ngemvubu kanye lezinja abehanqe umthethwandaba weHigh Court njalo ake aphosela abantu intuthu ehitshayo eye tear gas. Obephethe loludaba nguMahluli uMartin Makonese.
UMnu. Effi Dlela Ncube, isikhulumi senkosi ebizagcotshwa uBulelani Lobhengula Khumalo ngaphansi kwenhlanganiso yeRoyal Crown Trust, uthe uMakonese wethule isinqumo lesi ngesikhathi ithole lesizwe selifikile eZimbabwe njalo kulabantu abanengi olumangalisayo abavela kwamanye amazwe enjenge South Africa, Botswana, Lesotho Swaziland lamanye, bevalelwe ukuthi bengangeni kwele Zimbabwe.
Bekugcwele abantu lalapho obekukhulunywa ngodaba lolu ngabaphathintambo bakahulumende, izinduna labanye ababona ngezomdabu.
Igqwetha ebelimele abaqoqi bomcimbi lo, uMnu. Dumisani Dube, uthe lokhu kwaliwe ngumthethwandaba.
Induna uNyangazonke utshele iStudio 7 ukuthi kuyabamangalisa ukuthi kuyini okwenza umpathintambo wohlangothi lukahulumende olubona ngezemadolobheni lezemaphandleni, uMnu. Julu Moyo, azithulele isikhathi sonke lesi ephethe incwadi yokubazisa ukuthi abavumelani lokugcotshwa kwenkosi.
Laloba isinqumo lesi sifakiwe, abakaMthwakazi laba bathe bazaqhubekela phambili ngokugcotshwa kwenkosi yabo njalo uMnu. Ncube wazise iStudio 7 ukuthi kulamabhasi angamatshumi amabili lanhlanu avalelwe emgceleni weZimbabwe leSouth Africa athwele abantu akade sebebesiza emcimbini lo.
Omunye njalo osekela uMthwakazi, uMnu. Mxolisi Mahlangu, uthe umthetho lo wenziwa ngabomo ukuze ubulale umbuso waMaNdebele.
Prince Bulelani Lobhengula Khumalo
Umcimbi wokugcotshwa kwenkosi ubungafunwa ngabanye abathi labo yibo abafanele babe zinkosi kanye lohulumende weZimbabwe.
Ekuseni ngoLwesihlanu induna kanye lamalunga edale lephalamende agoqela uMoyo, uMnu. Obert Mpofu, kanye loNkosikazi Angeline Masuku, umkhulu wezinduna uMnu. Fortune Charumbira bahlangene bezama ukuthi bathathe isinqumo ngaloludaba kodwa kwacina kuvunyelwana ukuthi udaba luzaqedwa ngumthethwandaba.
AbakaMthwakazi bebetshengisela phambi kwewotela lapho obekulomhlangano khona basuka lapho baya emthethwandaba.