Osomabhizimusi beZimbabwe ababili abacatshangelwa ukuba batshontsha imali kahulumende phansi kohlelo lwePresidential Goat Pass-on Scheme edlula izigidi eziyisikhombisa zamadollar eMelika – US$7.3 million bavalelwe entilongweni namuhla bemelele ukuthoniswa amacala okweba imali yelizwe.
UMoses Mpofu loMike Chimombe bamiswe emthethwandaba kamantshi eHarare besetheswa ukuqambula imali le okwakumele beyisebenzise ukuthenga imbuzi zabantu abahluphekayo ezabelweni zonke ezedlula inkulungwane ezingamakhulu ayisithupha lamatshumi amabili – 632,000.
Umthethwandaba uthi behluleka ukukwenza lokhu bacine bethenge ezedlula kancane inkulungwane ezine 4,208. ezazibiza inkulungwane ezingamakhulu amathathu amadollar eMelika - US$331,445. Abakukhomishini yeAnti-Corruption Commission ababamangalele emapholiseni bathi uMpofu loChimombe batshayela esikhewini phose imali yonke abayiphiwa luhlangothi lwezokulima olweMinistry of Lands besebenzisa inkampani yabo engekho emthethweni eyeBlackdeck Livestock and Poultry Farming.
Uhulumende wacina evalisa isivumelwano abasilobelana labo ngomnyaka ka2021 esenanzelele ukuba baqamba amanga ngokuthi balembuzi ezedlula inkulungwane ezingamatshumi amathathu 32,500 okumele bezinike uzulu.
Kodwa kukhanya bathenga iminjanja eyingcosana kulokuthi benike uzulu ezilohlonzi okwakumele abantu beziqhubelane beze bebelemihlambi ethe xaxa. Umtshutshisi kahulumende ucele ukuba ababili laba bevalelwe entilongweni ngoba balakho ukuhluphana labafakazi. Igqwetha labo uMnu. Ashely Mugiya uthe kabasoze bakhulume okwenzakale namuhla emthethwandaba esithi udaba lolu lulakho ukuphazamiseka bengakhuluma lentathelizindaba.
“Tshiyananai lathi. Asisoze silitshele okwenzakale edale namhlanje. Nxa sesiqhubeka sizalitshela. Asila okukukhuluma lani namhlanje.”
Elinye iqgwetha leHarare, uMnu. Melusi Mabhena, uthe udaba lolu luyamangalisa ngoba kubotshwe uChimombe loMpofu khona kulabantu abanengi abaphatheka kunkohlakalo.
“Ukubotshwa kwabo kuyinto edanisayo kodwa yinto esiyikhangeleyo ngoba sinanzelela ukuba icala labo ngelokuba bakhuluma ukuba uChivhayo wabancindezela sidaniswa yikuba abakabambi uChivhayo.”
Kodwa elinye igqwetha, uMnu Herbet Dube, uthe udaba lolu luyathabisa ngoba abantu abenza inkohlakalo bayabotshwa.
“Sithaba ukuba abantu abenza lokhu bayabotshwa sithemba ukuba kuzaqhubeka kukunje ize iphele icorrupotion kwele Zimbabwe.”
Akwaziwa ukuba kuzabotshwa kumbe hatshi uMnu. Wicknell Chivayo okucatshangelwa ukuba wayedlelana lababili laba. Uyakuphika lokhu esithi uMpofu loChimombe ngabantu abangathembekaliyo.
Kolunye udaba, uMongameli Mnangagwa namuhla uphawule uhlelo lwe Zimbabwe Multi Sectoral Drugs and Substance Plan 2024 to 2030 oluhlose ukulwisana lezidakamizwa kusetshenziswa imizamo ehlukeneyo egoqela ukupha abatsha ithuba lokukhulumisana lohulumende ukuqeda udubo lolu.
'' Namhla siphawule uhlelo lapho esifuna ukulwisana lezidakamizwa eziphazamisa abatsha bonke''
Okhulume le Studio 7 uMnu. Gugulethu Moyo okunhlanganiso elilswasana lalokhu eyeAnti Drugs Culture uncome okwenziwe nguMnangagwa.
“Udaba lolu luqakatheke kakhulu sithemba ukuba kuzalingiswa ukuze abatsha babelekusasa elihle.”
Ele Zimbabwe libhekana lodubo lokuthathwa kwezidakamizwa ikakhukhulu ngaabasakhulayo okwenza ukuba elakusasa labo licine liphambaniseka.
SEE ALSO:
Udaba Esilwethulelwe Mlondolozi Ndlovu