Amalunga ebandla leMthwakazi Republic Party amane abotshwe izolo ngesikhathi abantu besethula imibono yabo kukhomishini ehlolisisa ukubulawa kwabantu kusanda kwenziwa ukhetho eHarare, bakhululwe kwathi omunye wabo wavalelwa entilongweni.
UMnu. Kgalema Motlanthe labanye bakhe bathapha imibono kazulu koBulawayo.
UMnu. uMarshal Sibiya, Welcome Moyo loVenat Ncube bahlawuliswe imali yesibambiso sebail efika ikhulu lamatshumi amahlanu - $150 umuntu munye ngamunye.
Kodwa umantshi uRachel Mukanga uthe uMnu. Siphambaniso Mafu, onike ubufakazi kukhomishini ekhokhelwa nguMnu. Kgalema Motlanthe, umvalele entilongweni esithi ulakho ukuthi abanye bakhe bamvimbele ukuba abuye emthethwandaba.
UMafu utshele ikhomishini le ukuthi uMongameli Emmerson Mnangagwa wabulala abazali bakhe ngesikhathi sombhuqazwe weGukurahundi.
Amapholisa abegcwele indawo yonke lapho okwenzelwe khona umhlangano wekhomishini ekhokhelwa nguMnu. Kgalema Motlanthe.
Wetheswa icala lokudelela umongameli welizwe.
UMnu. Tanaka Muganyi oweAbammeli Lawyers for Human Rights ubikele umthethwandaba ukuba uMafu uhlukuluzwe ngamapholisa kabuhlungu ngesikhathi ebotshwa njalo bamfake isandla phambi kweKhomishini kaMontlante.
Uthe uMafu ucine esiyakwelatshwa esibhedlela seUnited Bulawayo Hospitals.