Isakhiwo sikahulumende weZimbabwe eseCape Town kwele South Africa sithengisiwe ngoMvulo phansi kwesinqumo somthethwandaba ukuze kuhlawulwe indleko zaleli dale zemali eyachithwa ngabalimi abamhlophe belwisa ukuhlawulwa amapulazi abo abawathathelwa kungelambadalo.
Inhlanganiso elwela amalungelo oluntu kweleSouth Africa eye AfriForum, ithi ukuthengiswa kwalesi sakhiwo yikuphumelela kwemizamo yokubamba ngamandla uhulumende weZimbabwe ukuthi alandele isinqumo somthethwandaba wamaze angezansi kweAfrica owe SADC Tribunal, owafumana ukuthi ukuthathelwa kwabalimi laba amapulazi abo kwakungekho emthethweni, kulobandlululo njalo kuphikisana lemithetho yomhlaba jikelele.
Ngemva kwemizamo yabathile ababefuna ukuthenga isakhiwo sikahulumende weZimbabwe lesi, ummeli womthethwandaba umnumnzana Morne van der Vyver unqume ukuthi ithengiselwe umnumnzana Arthur Tsimitakopoulos ngezigidi phose ezine zamarandi R3, 760million.
Uhulumende weZimbabwe ubikwa eke wazama ukumisa ukuthengiswa kwalesi sakhiwo esithi usezabhadala imali yendleko ezahlangana le Afriforum emthethwendaba ngaloludaba, kodwa yacina isithengisiwe ngoba leyo nhlawulo ingabonakali.
Inhlanganiso ye AfriForum ithi ngokokuqala embalini yezwekazi le Africa ukuthi impahla yelizwe ithengiswe phansi kwesinqumo somthethwandaba esithinta ukwephulwa kwamalungelo oluntu.
Igqwetha lenhlanganiso ye AfriForum umnumnzana Willie Spies, uthi ukuthengiswa kwendlu yeZimbabwe le eku number 28 Salisbury Road, Kenilworth, Cape Town, kukhombisa khona ukuthi kungephulwa amalungelo oluntu, ilizwe lingajeziswa lihlawuliswe kusetshenziswa imithethwandaba yamazwe angomakhelwana.
Ngo 2008 abalimi abathathelwa amapulazi ngodli bamangalela uhulumende weZimbabwe emthethwandaba we SADC Tribunal. Lumthethwandaba wethula isinqumo sokuthi uhlelo lokwabiwa komhlabathi eZimbabwe kuthathelwa abalimi abamhlophe amapulazi lwalungekho emthethweni ngakho labo balimi kufanele bahlawulwe.
Ngemva kokuba iZimbabwe ingasinakana leso sinqumo abalimi laba bacela inhlanganiso ye AfriForum ukuthi ikweze loludaba emthethwandaba yakweleSouth Africa.
Lwaqalake eHigh Court, lwaya eSupreme court lwaze lwacina luse Constitutional court yonke le imithethwandaba isithi iZimbabwe kufanele ihlawule laba balimi njengokutsho komthethwandaba we SADC Tribunal, kwalaywa njalo ukuthi ihlawule zonke indleko zemali eyachithwa ngabalimi laba belwisa loludaba emthethwandaba.
Limpahla yeZimbabwe ithengiswanje ngemva kokuba iZimbabwe yehlulekile ukuhlawula leyo mali eyasetshenziswa emthethwandaba.
Umnumnzana Spies uthi lobanje limali bazayabelana lelinye ibhanga lase Germany lalo okwathiwa lithole imali yalo ekuthengisweni kwale indlu yeZimbabwe, okuqakathekileyo kibo kasiso silinganiso semali abazayithola kodwa ngumutsho walesi sehlakalo.
Uthi osekuzalandela yikudinga umthethwandaba womhlaba ozaphawula inani lemali okufuze iZimbabwe iyibhadale ekuhlawuleni abalimi laba ngamapulazi abo athathwayo. Ngesikhathi sohlelo lokuthathwa kwamapulazi inengi labalimi abamhlophe babetshaywa, abanye bebulawa ngocuku besekuthiwa baphume baphele kulawo mapulazi belengise izandla.
Imizamo yokuthi uhulumende weZimbabwe aphefumule ngaloludaba ibingakaphumeleli ngesikhathi sisiya emoyeni.
Your browser doesn’t support HTML5
Udaba lwesakhiwo sikahulumende weZimbabwe kwele South Africa Esesithengisiwe