Kulamazwe ayisikhombisa alamankampani asemhlanganweni walonyaka oweZim Exporters Week koBulawayo, oqoqwe luhlangothi olubona ngokuthenga lokuthengiselana olweZimTrade.
Abasemhlanganweni lo, ovulwe okusemthethweni namuhla nguMongameli Emmerson Mnangagwa ngoLwesine, bathi kulabosomabhizimusi bakwamanye amazwe abathakazelela impahla ethengiswa eZimbabwe.
Amazwe asemhlangaweni lo oqutshwa phansi kwesihloko esithi “Start, Qala, Tanga” ophansi kohlangothi lukahulumende olweZimTrade emanyane lebhanga leStanbic leAfrica Export-Import Bank, agoqela eleAngola, Bostwana, Namibia, Mozambique, South Africa, Zambia leUnited Kingdom. Omele ibhanga leAfrica Export-Import Bank, uMnu. Ebuka Okaja, uthi zinengi inhlelo abalazo ezincedisa amankampani athengisela kwamanye amazwe.
"Silenhlelo esilazo eAfreximbank ezijonge ukuqinisa ukusebenza kwamankampani eAfrica ukuze bafinyelele kuzinga lamavhizimusi omhlaba jikelele njalo eleZimbabwe ngelinye lamazwe alobudlelwano obuhle lebhanga lethu yikho silapha.”
Othenga izithelo lezilimo eZimbabwe oweVita Fresh Produce eyeUnited Kingdom, uNkosazana Daniela lvanova, uthi bakhangelele ukuthengisa impahla enengi kulandela ukukhulumisana labanye osomabhizimusi emhlanganweni lo.
"Sesileminyaka edluka itshumi lanhlanu kuleli sithenga izithelo lezilimo njalo sizakhulisa ibhizimusi lethu sebekhona esikhulume laba ekufikeni kwami njalo uhlonzi lwezilimo zakuleli liphezulu. Senza imali engange ten million pounds ngomnyaka njalo eleZimbabwe lihamba phambili."
uMnu. Similo Nkala
Banengi abakhangelele ukuthuthukisa amabhizimusi abo njalo labaqakathekisa umhlangano weZimbabwe Exporters Week. UMnu. Similo Nkala okuZimTrade uti lesiyisikhathi sokuthengisa yonke impahla elungiswa eZimbabwe.
"Siqalise mhllaka 14 Mfumfu labathengi bempahla labosomabhizimusi ukuze baqinise ubudlelwano. Umhlangano lo ujonge ukusombulula ubunzima obuhlangana labosomabhizimusi abathengisela phandle kwelizwe."
Ohlaziya ezomnotho, uMnu Rejoice Ngwenya uthi kuyadanisa ukuphathwa komnotho eZimbabwe.
"Udubo yikuthi lamatshe aligugu athengiswa enjalo engahluzwanga ilizwe seluphila ngokuthenga impahla kwamanye amazwe njalo lombuso okhona uloncindezelo."
Evula okusemthethweni umhlangano lo, uMnangagwa ukhuthaze osomabhizimusi ukuba basebenzise ulwazi lwakulez’insuku olweArtificial Intelligence ukuze bethuthukise amabhizimusi abo.
“Kuqakathekile ukuthi lisebenzise ulwazi lweArtificial lntelligence ukuze lithuthukise inzuzo yempahla eliyithengisa kwamanye amazwe."
Uphinde wakhuthaza amankampani eZimbabwe ukuba athengise impahla yawo kwamanye amazwe.
“Kuhle ukuba ibhanga leAfreximbank liyasisekela ngakho ngikhuthaza amankampani angakaqali ukuthengisa kwamanye amazwe ukuba baqale ukuze ilizwe lithole inzunzo lokhu kuzakwenza lokuba ibizo lethu likhuphuke emhlabeni jikelele abantu bemazweni bavele baayakhwabitha impahla zakuleli."
Umhlangano wabathengi labathengisi ugqitshwa ngoMgqibelo.