Abaphila ngokuthengisa abakoBulawayo, bamukele ngentokozo uhlelo lokuhlatshwa ijekiseni eyeCOVID 19 Vaccine, bethi lokhu kuzakwengeza amathuba okuthi uzulu avikeleke njalo kuvulwe indawo zokuthengisela uzulu abuyele masinya kumpilo akade eyiphila naphambilini kokuqhamuka kwalolu bhubhane. Uhlelo lolu oluqale namhla lukhangelelwe ukuqhutshwa okwensuku ezilitshumi ezilandelayo.
Umnunzana Mike Ndiweni umqondisi we Bulawayo Vendors and Traders Association uthi kuhle ukuthi ijekiseni isize yafika ebantwini abasemkambo abazisebenzayo.
"Siyamukela ukuthi ijekiseni isifikile ebantwini bemkambo abazisebenzayo, vele besikhankasa ngakho ukuthi ijekiseni ayifike emkambo abantu abazisebenzayo bephathwe njengabantu abaqakatheke kakhulu kwezomnotho lokuthuthukisa ilizwe.Ngokunjalo siyakwamukela lokhu sesikhuthaza uhulumende ukuthi kakhankase abatshele abantu abasemkambo ukuthi ijekiseni isifikile behambe bayehlatshwa ukwenzela ukuthi sifike kulokhu abathi ngesikhiwa yihead immunity ilizwe livuleke sisebenze siyephambili lathi njengenhlanganiso siyazama ukuthi sikhankase sikhuthaze amalunga ethu ukuthi ahambe ayehlatshwa.”
Unkosikazi Jacqueline Ndlovu omunye wabathengisa emkambo uthi uhlelo olusungulwe nguhulumende luhle kakhulu kodwa abanye kade bebiselwe emuva ngoba besebenza okungekho emthethweni.
"Uhulumende usungule uhlelo lokuhlaba abazisebenzayo endaweni zabo abathengisela kizo kumbe duzane lazo, uhlelo lolu luhle kakhulu ngesikhathi umkhuhlane usumemetheka kangaka. Kodwa sibelohlupho lokuthi banengi ababiselwe emuva ngendaba zokuthi abalawo ama license endaweni abathengisela kuzo, kodwa njengomuntu ozisebenzayo ngiyananzelela ukuthi ayisibo bonke abalamalicense ngoba inengi lethu lisebenza okungekho emthethweni.”
Unkosikazi Madade Ndlovu omunye wabathengisayo uthi khathesi asenanzwa amalungelo abo.
“Ama informal traders lathi siqakathekile, we really need to be vaccinated ngoba abanengi ukusukuma sisiya empilo kuthatha isikhathi now sekusiba le problem encane abanye abahambileyo kuthiwa they where turned away because abala malicenses. Mina ngibona angathi itarget yabo akade beyisethile they will never get it.”
Umqondisi wezempilakahle kukhansili yakoBulawayo umnunzana Edwin Sibanda uthi bakhangelele ukuthi kuhlatshwe abantu abangaba zinkulungwane ezilitshumi lanhlanu-15,000.
"Okwakhathesi sihlaba ama informal traders around iBulawayo, ama doses esilawo ayi15 000 for ifirst dose isecond dose khona izabuya siyawafaka emaclinic onke lama mobile clinic azabe ekhona encedisa. Sikhulume langokuthi sizabe sihlaba kumahotspot so ngeke sihlabe ama informal trader kuphela ngoba abantu bawoda ebantwini besiyathengisela abanye.”
Lolu hlelo lubikwa lujonge ukuthi lapho lugqhitshwa ngemva kwensuku ezilitshumi kube sokuhlatshwe abantu abazinkulungwane ezilitshumi lanhlanu-15,000.
NgoLwesibili luqalele esilindweni samabhasi ese Renkini, eSekusile, eCity Hall lakwezinye indawo zemikhambo yako Bulawayo.
Your browser doesn’t support HTML5
Udba lokuhlatshwa kwabaphila ngokuthengisa umjovo weCovid siluphiwa nguBathabile Masuku