Soluqalile elizweni lonke uhlelo lokunika abantwana abaleminyaka elitshumi kusiya phansi umuthi wokwenqabele igciwane lepolio elitholakale eMashonaland leHarare okulabathathu ababanjwe belegciwane leli.
Uhlelo lolu olusungulwe ngoLwesibili luphansi kohlangothi lwezempilakahle eZimbabwe, inhlanganiso yeUNICEF leyeWorld Health Organization njalo luphethwe yiGlobal Eradication Initiative eyesungulwa ngo2021.
Lokhu ngokukuqala ukuba eleZimbabwe linika abantwana umuthi obizwa ngokuthi yi-OPV2 vaccine osetshenziswe kwele Ethiopia, Benin, Congo Republic, Liberia, Nigeria lakwele Sierra Leone kusukela ngomnyaka ka2021. I-UNICEF ithi kukhangelelwe ukuba abantwana abafika izigidi ezine – 4 million bazanikwa imithi le kusukela namuhla kuze kuyefika uNcwabakazi ngomnyaka ozayo. EleZimbabwe linikwe umuthi olesisindo esedlula kancane izigidi ezilitshumi lengxenye – 10,6 million vaccines. UMnu. Douglas Mombeshora ophethe uhlangothi lwezempilakahle uthi kuqakathekile ukulwisana lomkhakha we-polio okuthiwa yi-poliovirus type 2.
Umzali obehambe lomntwana ekilinika eTshabalala
Uhlelo lweNovel Oral Poliomyelitis Vaccine 2 luqhutshwa emakilinika lezibhedlela. Omunye wabaphethe ohlelo lokunika abantwana umuthi wepolio ngumkhokheli wabongi kukhansili yedolobho lakoBulawayo uNkosikazi Sithokozile Hove
Omunye wabangowokuqala ukuhambisa umntwana ekilinika nguNkosikazi osphine Hasani okhonza eAfrican Apostolic Church KoMwazha eTshabalala Clinic
Kukhangelelwe ukuba abantwana abedlula inkulungwane ezingamakhulu amabili-214,586 bazanikwa imithi phansi kohlelo lolu ngoLwesibili.
Okwenzakale ngoLwesibili eTshabalala
Isakhamuzi sakoBulawayo uMnu Gordin Ncube oyenelise ukuthontisela abantwabakhe ababili ukhuthaza abanye obaba ukuba benze njalo.
Isakhamuzi seNyamandlovu, uNkosikazi Bhebhe uthi bahamba umango omude besiya esibhedlela njalo uhlelo lokuthontisela belungakafiki emangweni wabo uhle wathatha lelithuba ezohlolisa umntanakhe ukuthi ahle athontiselwe.
Ngomnyaka odluleyo ngoMfumfu uhulumende ubike ngokufunywana kwePolio eSanyati emntwaneni oleminyaka engaphansi kwelitshumi. EleZimbabwe lacina ukuba labantwana ababanjwa iPolio ngomnyaka ka1989, kuthi ngomnyaka ka 2005 iZimbabwe yathola imendulo yokuba lilizwe esenelise ukuwuqeda umkhuhlane wePolio kulandela uhlelo lwayo oluqinileyo lokuthontisela abantwana umuthi wamavaccine.