Omunye wabaziwa ngokulwela amalungelo oluntu, wakoBulawayo, uNkosikazi Cora Ndebele useqale uhlelo lwakhe lwekhitshi yokuphekela abantu ukudla abakuphiwa kungela nhlawulo, olujonge ukwehlisa inhlupho zendlala ngesikhathi ilizwe libhekane lobhubano olweCovid-19.
Inengi labantu libhekane lendlala emangalisayo emadolobheni lemaphandleni eZimbabwe osokwenze abanye abanjengoNkosikazi Cora Ndebele baqale inhlelo zokunceda abaswelayo.
Yena uqale olokuphekela abantu ukudla elokitshini leMakhandeni koBulawayo emizameni yokumelana lendlala ngesikhathi inengi lingenelisi ukuziphilisa phansi kweziqondiso zeCovid-19 Lockdown.
UNkosikazi Ndebele uchaza isizatho sokuqala umkulu wokuphekela abantu ukudla kungela nhlawulo.
“Uhlelo lolu siluqale ngemva kokunanzelela ukuba impilo zabantu zaphambaniseka kuqala umkhuhlane weCovid-19 okudale indlala emulini ezinengi sabona kufanele ukuqala uhlelo lokubaphekela ukudla ngoba kubanganeno uma abantwana bedlile labazali umthwalo uba nganeno uma abantwana bedlile.
UNkosikazi Nomagugu Mahlangu ubonga uhlelo lokuphekela abaswelayo.
“EMakhandeni Siyabonga uhlelo lokutholiswa ukudla ebentwaneni olwaqalwa nguNkosikazi Ndebele. Abantwana bathola ilambazi emini yantambama bathola itshakada, isitshwala rice lokunye okuyabe kukhona ngalelo langa. Lathi kwenza kubelula kithi sihlanganise esiyabe silakho kodwa ngamanye amalanga vele badla khona babuye sebezolala. Uhlelo lolu luhle njalo siyalusekela.”
Kuhlelo lweMakhandeni Soup Kitchen
UMama uMaria laye ubonga uhlelo lokuphekela abantwana emzini weMakhandeni ngesikhathi seLockdown.
“Siyabonga kakhulu ngohlelo olwenzakala lapha eMakhandeni lokutholisa abantwana ukudla. Ngesimo esikhona abantwana bayancedakala kakhulu ngoba banengi abantwana abeza lapha ukuzokudla indlala sebeyizwela kwezinye indawo.”
Inengi lezimuli ezithola usizo eSoup Kitchen kaNkosikazi Ndebele, bathi uhlelo lolu luhle kakhulu njalo bayabonga ngoba abantwana besigaba indlala abasayazi.
Kuhlelo lweEmakhandeni Soup Kitchen
IZimbabwe ibhekane lendlala lokusilela kwamanzi emadolobheni kanye lasempandleni kungenxa yokungani kahle kwezulu kuminyaka emibili kusiya kwemithathu edluleyo osekubangele ukuba abantu beqale ukuphekela abanye ukudla kungelambadalo kuthi lenhlanganiso zamazwe omhlaba ziyakutsho ukuba eZimbabwe inengi labantu liyalala livuka lingatholanga okokuphosela emlonyeni ngoba ilizwe lingelinye lamazwe awezwekazi leAfrica abhekane lendlala enkulu.
Inhlanganiso eziphathisa ngokudla ezigoqela oWorld Food Program, zithi izigidi ezithoba minwe mibili zabantu eZimbabawe, zikusimo sendlala eyesabekayo ngakhoke kudingwa uncedo lwesiphangiphangi.
Your browser doesn’t support HTML5
Udaba Esilethulwe nguAnnahstacia Ndlovu