Ngqwele Dube
Inhlanganiso elwisana lokuthathwa kwezidakamizwa eZimbabwe iqhuba umkhankaso wokukhanga abatsha ukuba betshiyane lentshengu, icocaine, mbanje, crystal meth lokunye okubenza bevuke eseganga.
Inhlanganiso ebizwa ngokuthi Eyethu, ekhokhelwa nguMbusi Dube ohlala kweleBhilithane, isanda kuqhuba umkhankaso omkhulu wokulwisana lezidakamizwa owenzelwe eHighlanders FC Clubhouse, obekulamaqembu omdlalo wenguqu ayisithupha. Amalunga enhlanganiso le athethe leli thuba alimukisa abatsha ngobubi bezidakamizwa. Kumkhankaso lo bekulamaqembu abesilisa amane athi Izinsizwa, Amavevane, Bulawayo Legal Practitioners leZitha. IHighlanders Royals leZimbabwe Republic Police bezikusibaya sabesifazana. UDube uthi izidakamizwa sezibulele ingqondo zabatsha lasebekhulile abanengi eZimbabwe.
"IBulawayo isihlaselwe ngumkhuhlane wentshengu, intshengu isiqede abantu abanengi njalo abanye sikhuluma nje base Ingutsheni Hospital bethi befika eIngutsheni bethi ulapha ngenxa yenqondo, inqondo ngesilungu bathi yimetal health issues, ziyahambelana zibambisana lentshengu."
UDube uthi ulethemba lokuthi umbiko wabo usabalele emphakathini kulandela ukuqhutshwa komkhankaso lo eHighlanders Clubhouse. Umqondisi weRechabites Trust, inhlanganiso layo elwisana lokuthathwa kwezidakamizwa layo ibisemkhankasweni lo. Umqondisi wayo nguZenzo Siwela.
"Siyabaxwayisa ukuthi intshengu iyabulala, njalo bengayamukeli idrink evuliweyo these days bahlanganisa intshengu lePepsi konke lokhuyana kuyabe kumnyama kungakhanyi, isizwe sakithi sifuna abantwana abazakhula bekwazi ukuthi amadrugs doesn’t enhance skills vele it destroys imind labo iyabayenza ikusasa yabo iphele masinyane.”
Owayengumdlali wenguqu owake wadlalela iHighlanders, Monomotapa kanye leTP Mazembe eyeDRC, uMthulisi Maphosa, ubengomunye wabadlali beAmavevane abaphatheke kumkhankaso lo.
Mthulisi Maphosa
"Lapha besizofaka iawareness yama drugs, thina as ama former players sizama ukunceda abafana ukuthi say no to drugs, ama drugs ayalimaza abantu ababisele emuva, ayenza ukuhlukumeza lokudubekisa abantu, I think itournament le ibe yisuccess ngoba ifake iawareness ebantwini abancane lebantwini abakhulu ukuba kwazi ingozi zama drugs"
Banengi akade besemkhankasweni oqoqwe nguDube. UJabulani Mahlangu oweqembu leBulawayo Legal Practitioners uthi bathakazelela okwenziwe zinhlanganiso ezilwisana lokuthathwa kwezidakamizwa.
"Thina njengama lawyers esihlangana lakho emacourt rooms kunengi uzathola ukuthi amacala amanengi enzakala due to drugs and substance abuse. Sithole leli ithuba yokuthi siparticipete salithatha ngezandla zonke so that we can also conscentise umphakathi ukuthi ama drugs awalunganga sithemba ukuthi going forward lathi nxa sisiya Ema court sizahlanga loku lutshwana okuyabe kudalwe yikuthi abantu bayabe besebenzise izidakamiswa."
Inhlanganiso ezilwisana lokusetshenziswa kwezidakamizwa zithi abatsha abayisilinganiso sokufika phose amatshumi ayisithupha ekhulwini basengozini yokulahlekelwa yimpilo zabo ngenxa yezidakamizwa.
SEE ALSO:
Udaba Esilwethulelwe NguNgqwele Dube