Umhlangano omkhulu wabasakazi abaphuma kuzwekazi leAfrica, kanye lamanye amazwe, oweAfrican Union of Broadcasting, uqale lamuhla kwele Botswana lapho okuhlaziywa kabanzi indima edlalwa yikusetshenziswa kokukhalipha kokuzibazela ngemitshana okwaziwa ngokuthi yiArtificial Intelligence (AI).
Obambe okwesikhatshana isikhundla sikamongammeli weBotswana, uMnunzana Slumber Tsogwane, evula lumhlangano namuhla, uqonqosele ukuthi kufanele izwekazi leAfrica lenelise ukusakaza indaba zalo ngendlela elifuna ngayo.
African Union of Broadcasting conference in Botswana
“Sokuyisikhathi sokuthi sibe yithi esisakaza ngendaba zezwekazi le Africa. Yini abantu abangasakazi udaba lweAfrica.
UTsogwane uthi lumhlangano uzangesikhathi intathelizindaba zibhekane lokusentshenziswa kwe Artificial Intelligience kanye lezinye indlela zemitshinna yokusabalalisa imibiko. Uthi lokhu kulakho ukuncendisa intathelizindaba njalo lokuphazamisa ekuqhubeni umsebenzi wabo, ngokwethula imbiko engaqondanga.
"Kumele sinanzelele ukuthi iartificial intelligience isinceda ngani njalo sibekwazi ukuthi ingasiphazamisa kanjani. Ilakho okuhle njalo ilakho okungalunganga okufana lokulahleka kwemisebenzi kanye lokusakaza indaba ezingayisilo qiniso."
Umhlangano we African Union of Broadcasting ungowe tshumi lanhlanu kusukela ngomnyaka ka1962, lapho inhlanganiso le eyabunjwa khona ngenhloso yokuthuthukisa imsebenzi yokusakaza.
African Union of Broadcasting conference in Botswana
Umsakazo we Voice of America, umelwe emhlanganweni lo nguMnunzana John Lippman ongumqondisi wenhlelo zendimi, kanye lomqondisi wenhlelo kuhlangothi lwezwekazi le Africa, uMnunzana Mwamoyo Hamza.
UHamza utshele iStudio 7 ukuthi babone kuqakathekile ukuthi bangene lumhlangano ukuze bathuthukise ubudlelwano labanye abasakazi kuzwekazi leAfrica.
“Kuqakathekile ukuthi sibe kulomhlangano ukuthi njengehlanganiso sisakaze indaba zeAfrica, ngendlela ye Africa njengalokho esivele sikwenza. Kuqondile ukuthi lathi sibe yingxenye yeAfrican Broadcasting Union.”
African Union of Broadcasting conference in Botswana
IV-O-A, kanye lezinye inhlanganiso ezisakazayo ezifana leSputnik eyeRussia, lezinye ezeChina, ziyamukwelwe njengamalunga amatsha awe African Union of Broadcasting ngoLwesibili.
UHamza uthi iV-O-A ihambelana lendikimba yomhlangano yona ekhangelane lokuthi i-Artificial Intelligience kanye lokuguquka komkhathi kuphazamisa njani umsebenzi wabasakazi.
“Zindaba eziqakathekileyo, ikakhulu sikhangele iArtificial Intelligience yona engaphathisa umsebenzi wokusakaza, kodwa futhi kumele isetshenziswe ngonanzelelo ngoba ilakho ukuphazamisa umsebenzi wokusakaza.”
Ukungena kunhlanganiso yeAfrican Union of Broadcasting yimsakazo yakwele Melika, China kanye leRussia, kukhomba ukuqakatheka kokubumba ubudlelwano lamazwe weAfrica ngendaba zokusazaza, kutsho ingcwethi kwezokusakaza, uMnunzana John Masuku.
African Union of Broadcasting conference in Botswana
“Kuqakathekile ukuthi beze kulimhlangano ukuthi bakwazi ukuthi kuyini okwenzakalayo. Sekusiya ngokuthi amazwe akhululeke okungakanani. Kudala kwakunzima ngoba sasikwazi ukuthi kwakule Cold War. Kodwa kathesi amazwe asekhululekile.”
UMasuku uqhubeke esithi ukufundisana phezu kweArtificial Intelligience kwezokusakaza, akungeke kusavikwa ngoba kuludaba oluqakatheke kakhulu.
“Kusiza ku Artificial Intelligience, sekulendlela ezilula ezokuthi balungise imbiko yabo, balungise inhlelo zabo. Ukuza kwabomakhala ekhukhwini kwenza umsebenzi wokuthapha indaba ukuthi uguquke. Into lezi zilakho ukusentsheziswa ekugangeni kumbe ekuthuthukeni.”
EleZimbabwe limelwe yiZimbabwe Broadasting Corporation, elilunga leAfrican Broadcasting Union, yona elamalunga angamatshumi amane lasikhombisa (47) kuzwekazi leAfrica.
Umhlangano lo uzaphethwa ngoLwesine lapho okuzakhitshwa uluhlu lwezivumelwano zokusakaza ngamalunga enhlanganiso yeAfrican Union of Broadcasting.