Izakhamizi zakoBulawayo ziveze imibono ehlukileyo ngodaba lokuvusilela ezamabhizimusi lamafekithali koBulawayo.
Lokhu kuphume embuthanweni wokuxoxisana ngentuthuko yaleli dolobho oqoqwe ngabomsakazo weStudio 7, oweVoice of America bemanyene labeMedia Centre.
Abenelisa ukuba khona embuthanweni wayizolo owenzelwe eRainbow Hotel, koBulawayo, bathe ngaphandle kokuba kuqale kulungisiswe inkinga ezifana lokusilela kwamanzi, ukusilela kwamandla kagetsi okudala inhlupho zokusetshenziswa kabanzi kwemitshina yakulezi nsuku yamacomputer ukufinyelela ulwazi kanye lemisebenzi yenkohlakalo leli dolobho kalisoze lavuka libuyele kusimo sokuba kontuthuziyathunqa njengakudala.
Umngcinisihlalo wenhlanganiso yezakhamizi eyeBulawayo Residents Association, uMnu Winos Dube uveza imibono yakhe ngokuvuka kukaBulawayo.
“Indaba yokureviver iindustry yakoBulawayo yindaba esegudwini ekhulunywa ngumuntu wonke njalo yinto esiyifisayo sonke njengabahlali bakoBulawayo ngoba silodubo olukhona ngoba abantu abasebenzi akuphileki. Ukureviver industry yakoBulawayo yinto esiyikhangeleleyo ukuthi akwenziwe yonke imizamo siyabiza siyabiza sikhalela ukuthi uhulumende angenele abone ukuthi angathatha nyathela bani njalo njengoBulawayo sizinuka amakhwapha sikhangelanukuthi lathi singenza mizamo bani yokuvuselela idolobho.”
lsakhamuzi sakoBulawayo uMnu Zibusiso Mkhwananzi uthi lanxa kulemigoqo ethize uBulawayo kumele avuke noma kanjani.
”UBulawayo kumele avuselelwe ayephambili, ukwenzela ukuthi abantu Baki this bathole okokubamba, bathole impucuko lentuthukonezayenza lokuthi abantwana abazazalwa bathole kulentuthuko eyaphambili. KoBulawayo kulezinto ezimbalwa ezibambe intuthuko ezisukela kuhulumende lakumbuso obona ngezabelo.”
Osakhulayo uNkosazana Jacquline Ndlovu yena uthi umbuso wezabale yiwo ongavusa idolobho.
“Inkinga zonke esihlangana lazo edolobheni lakoBulawayo zimayelana lokubusa, ngokubona Kwakiutl ngabe umbuso wezabelo uyaqala ukusebenza ngoba yonke into izingeleza iphenduke endabeni yokubusa lokuzibusa.”
Izakhamizi zakoBulawayo zicele ukuba uhulumende atshengise isifiso sokuba idolobho livuke ngokusungula uhlelo lombuso wezabelo labasakhulayo batholiswe amathuba okusebenza lokukhokhela idolobho.
Amankampani amanengi akoBulawayo aseleminyaka phose engamatshumi amabili evaliwe engasebenzi osekutshiye idolobho lingela mafekitali athuthukisa isigaba.
Your browser doesn’t support HTML5
Udaba Silethulelwa ngu Annahstacia Ndlovu