Kuqhutshwa imihlangano embalwa eHarare ngesikhathi kulungiselelwa umhlangano omkhulu oweSADC Extraordinary Meeting, ozangenwa yinkokheli yamazwe akumhlubulo wezansi yezwekazi leAfrica.
Kukhangelelwe ukuba inkokheli le izahlolisisa impi ekweleDemocratic Republic of Congo, ukuxokozela eMozambique lokhetho olusanda kuqhutshwa kweleBotswana lamanye amazwe.
NgoMvulo kuqhutshwe umhlangano weziphathamandla zabohulumende ezibona ngezomvikela ezikuhlangothi lweMinisterial Committee of the Organ on Politics, Defence and Security Cooperation njalo loweSADC Organ Troika Summit obukhokhelwa nguMnu. Hussein Ali Mwinyi wakweleZanzibar.
Umbiko owethulwe yinhlanganiso le uveza njalo ukuba kukhangelelwe ukuthi kuzakwenziwa omunye njalo umhlangano ngoLwesibili ozakhokhelwa nguMongameli Samia Suluhu wakweleTanzania, ongumgcinisihlalo wohlangothi lweSADC Organ on Politics, Defence and Security Cooperation.
Inkokheli yeSADC izangena umhlangano omkhulu ngoLwesithathu okuzahlolisiswa isimo sezomvikela kweleDRC, Mozambique lamanye amazwe. Kasenelisanga ukuxhumana leziphathamandla zikahulumende weZimbabwe ukuze zikhulume ngodaba lolu ngoba kubikwa ukuba bezisemihlanganweni etshiyeneyo eyeSADC.
Sixhumane loMnu. Kuda Munsaka okubandla elibusayo othi kunengi okuzakhulunywa emhlanganweni ozayo okugoqela ukuxokozela okuseMozambique okulabaphikisayo abathi kabemukeli impumela yokhetho lukamongameli okunqobe uMnu. Daniel Chapo webandla leFrelimo.
Kodwa uMnu. Nhlanhla Moses Ncube unobhala jikelele wenhlanganiso yeFreedom Alliance uthi iSADC akukhanyi okuzakwethulwa yiSADC emhlanganweni ozayo.
UMnu. Fortune Mlalazi olandela ezombusazwe ezimele uthi kumele iSADC ibambe ziqine ngodaba lweMozambique.
Kulabanye abantu abathi ibandla leZanu PF lingenele kukhetho lweMozambique, South Africa lakweleBotswana okunqobe ibandla eliphikisayo. UMunsaka uthi la ngamanga aluhlaza tshoko.
Akwaziwa ukuba kuzakwethulwani emhlanganweni weSADC Extraordinary Summit mayelana lokhetho lweMozambique okulamapholisa asebulele abaphikisayo abedlula amatshumi amane – 42 abatshengisela emigwaqweni.
SEE ALSO:
Udaba Esilwethulelwe NguGibbs Dube