Kuqhamuke udlakela eMasvingo laseChinhoyi ngoLwesine emihlanganweni yokuzwa imbono kazulu mayelana lomthetho omutsha ophakathi kokubunjwa nguhulumende owePrivate Voluntary Organizations Bill, okubangele ukulimala komunye umuntu eMasvingo.
Lanxa isikhulumeli samapholisa uMnu Paul Nyathi etshele iStudio 7 ukuthi ubengakezwa lutho ngaloludaba, inhlanganiso elwela amalungelo oluntu eyeZimRights ikufakazile lokhu yathi umuntu olimeleyo lo uhambe wayakwelatshwa ngodokotela.
Abasekeli bebandla leZanu PF yibo ababikwa bephazamise imihlangano le besola izikhulumi ezethule imbono yazo zichothoza iPVO Bill zisithi ayimelanga ipasiswe lidale lePhalamende ngoba isipha uhulumende amandla okuvala inhlanganiso ezizimeleyo ezingavumelani laye.
I-ZimRights ithi njalo abanye abakhulume emhlanganweni weMasvingo, wona oqhutshekwe eCharles Austin Theatre, sebebalekile ezindlini zabo bayacatsha ngemva kokwethuselwa ngabasekeli bebandla elibusayo abachithe umhlangano lo ungakapheli.
Umhlangano weChinhoyi wona uqhubekile ngemva kokuphazanyiswa kodwa besokulokufuthelana okukhulu.
Ungapasiswa lumthetho, uzalawula ukusebenza kwenhlanganiso ezizimeleyo, okuyinto esolwa ngabalwela amalungelo oluntu kanye labamabandla aphikisayo.
Kodwa abebandla leZanu PF bayawusekela besithi ujonge ukwenqabela inhlanganiso ezihlose ukulimaza uhulumende zisebenza lezitha zeZimbabwe.
Umanyano weUnited Nations wona uthi uMongameli Emmerson Mnangagwa kamelanga awusayine lanxa ungapasiswa ngoba usephula amalungelo kazulu.
Ukuhlaziya loludaba sixoxe lengcwethi kwezombusazwe njalo eyiziphathamandla senhlanganiso yeNational Consumer Rights Association uMnu Effie Dlela Ncube, yena othi akumelanga wethulwe lumthetho.
Your browser doesn’t support HTML5
Ingxoxo loMnu Effie Dlela Ncube
Sehlulekile ukukhuluma lesikhulumeli seZanu PF uMnu Chris Mutsvangwa ngaloludaba.