Sokuvalwe ngci edale leCongress kulandela ukutshengisela kwabasekeli baka Mongameli Donald Trump abangene ngenkani edale leSenate lele House of Representatives kulandela inkulumo kaTrump eveze ukuba kasoze avume ukuthi unqotshwe nguMnu. Joseph Biden webandla lama Democrats kukhetho olwenziwe ngoLwezi nyakenye.
Abalandeli baka Trump, abatshengisela owamanje eWashington DC, bangene emadale la obekubalwa amavoti aweElectoral College aveza ukuba uBiden wanqoba uTrump.
Bangene eSenate umsekeli kamongameli, uMnu. Mike Pence, ebukele ingxoxo mpikiswano yamalunga edale leli abehlolisisa imizamo yabalandeli bebandla lama Republicans abazama ukuvimba impumela yokhetho lukamongameli.
Amalunga eSenate leHouse of Representatives abaleke abanye bacatsha ngaphansi kwezitulo kwathi abanye bangena emawofisini abo.
Amapholisa ehlulwe ngabalandeli laba okubikwa ukuthi abanye babo bebethwele imibhobho.
Amasotsha asebiziwe eCapitol Hill ukuzavimba abantu laba abadla amahabula.