Umhlangano omkhulu wokuhluza eziphathelane lengculaza oweInternational Conference on AIDS and STIs in Africa ka 2015, ugqitshwe ngoLwesihlanu.
Abangene kuwo bathi isifundo esikhulu okumele sithathwe ngohulumende, ababeka imithetho kanye labezempilakahle, yikuthi kudingeka ukuthi abantu bazimisele kakutsha ukuqhubeka besebenzela ukuqeda lumkhuhlane njalo inhlelo zigoqele wonke umuntu ikakhulu abasakhulayo okuyibo abasezinkini yaloludubo.
Emhlanganweni we ICASA
Kube ngamalanga amahlanu lapho ingcitshi ezitshiyeneyo, uzulu, abaphila lengculaza, abacubungula bedinga umuthi wokwelapha ingculaza kanye labasakhulayo bebethe gwaqa esigodlweni eHarare bevela emazweni alikhulu lamatshumi amahlanu kuxoxiswana ngodaba lwengculaza lengulamakhwa kuzwekazi leAfrica, kudingwa indlela ezintsha zokuyiqeda.
Evala lumkhosi lamhla, umongameli weICASA, uDr. Ahmed Cheikh, ubonge eleZimbabwe ngokuphatha lumsebenzi ngemva kokuthi iTunisia yehluleke.
Isikhathi sesifikile ukuthi izifundo zonke eziphume lapha ziyesetshenziswa, athi nxa lokhu kwenziwe kuyabalula ukuthi abantu baphathisane, ukumemetheka kwengculaza lengulamakhwa kwenqatshelwe.
Ukhuthaze ukuthi ohulumende banike itshumi ekhulwini lemali esetshenziswayo kwezempilakahle, ukuze kugcwaliswe injongo yokuqeda ingculaza ngo2030.
Uthe, “Konke lokhu esikwenze lapha kumele kusiphathise ukuthi siqhubeke sifunda, sithatha izinqumo ezilolwazi. Konke lokhu kuzasiphathisa ukuthi sibone ukuthi kuyini esesikufezile njalo yiziphi indingeko ezilokhu zisasalele thina sonke ukuthi usapho lwakusasa lwanelise ukugcwalisa injongo ye 90-90-90.
“Kungakho sikhuthaza ohulumende ukuthi balandele isinqumo esathathwa e-abuja ngo 2005 ukuthi amazwe anike ezempilakahle itshumi ekhulwini lemali yonke esetshenziswa elizweni.”
Umphathintambo wogatsha lwezempilakahle kuleli, uDr. David Parirenyatwa, uthi abangene lumhlangano kabahambe belesiqiniseko sokuthi izwekazi leAfrica lilakho ukuqeda ingculaza ngo 2030, okudingakalayo nje yikusebenzelana ndawonye, ukugoqela wonke umuntu kulimizamo.
Inhlelo ezizayo, uthi kumele ziqakathekise abasakhulayo ngoba lokhu kungenziwanga, isizukulwane esizayo, sizabhekana lodubo olwabakhona lapho ingculaza iqala.
“Njengamazwe ase Africa, kunengi esesikwenzile ekulwisaneni lengculaza. Siyenelisa ukuqeda ingculaza ngo 2030 ngokwamukela iziqondiso ezintsha lokusebenzelana lenhlanganiso ezitshiyeneyo. Kumele sikhuthazane ukuqhubeka sisebenza.
“Abantu bayacabanga ukuthi ngenxa yokuthi sesafika lapha, sekwaba lemithi, besebekhohlwa ukuqhubeka bezinakekela. Ngiyajabula ukuthi amazwe amanengi kuzwekazi le Africa lenkokheli zakhona, sezazimisela ukuphatheka kunhlelo zokuqeda ingculaza.”
Osebenza labaphila legcikwane, uNkosikazi Emma Chuma, uthi umhlangano lo uphathisile ukuthi abasebenza kuhlangothi lolu bakhuthazane, babonisane amaphutha njalo bancedisane bendawonye ukuthi yiwaphi amanyathelo okumelwe athathwe kuqhutshekelwa phambili ngomsebenzi.
Balokhu bekhuthaza ukuthi umuntu azi isimo sakhe, njalo akhulumisane lalabo aphila labo nxa elegcikwane, ngoba uthi ukufihla kwenza kubenzima ukuthi umuntu athole ukwelatshwa ngendlela njalo avikele abanye ekutholeni leligcikwane.
Lanxa umhlangano lo uqhutshwe kuhle, kube lokukhonona ngokuphathwa kwabathengisa imizimba kanye lezitabane befika kuleli, okuthe lalamhla kwaba lokungunguna ukuthi kungani bengekho kuzinqumo zezivumelwano ezethulwe kugqitshwa umhlangano .
Abakade bekhonona abatshengisele emhlanganweni owe ICASA
Udaba lokutshiywa kwabantu abatshiyeneyo kungxoxo zengculaza kube yindaba egudwini lapho ngoLwesihlanu abagogekileyo labo beke bamisa obekusenziwa kulumhlangano betshengisela bethule besola ukutshiywa kwabo endaweni zengculaza lengulamakhwa.
Eyinye insolo ibingethi inhlawulo yokungena kulumhlangano kumbe ukubukisa, ibiphezulu kakhulu ukuthi uzulu wakuleli ubengenelisi ukuyangena khona.
Umhlangano lo uqale ngeSonto, uphathwa ngaphansi kwendikimba ethi, ‘AIDS in Post 2015 Era, Linking Leadership, Science and Human Rights’.
Your browser doesn’t support HTML5
Udaba lweIcasa siluphiwa nguNothando Sibanda