Inhlanganiso ebona ngezempilakahle emhlabeni wonke eyeWorld Health Organization (WHO) ithi kuqakathekile ukukhankasela ukulwisana lomkhuhlane lo isithi kulabantu abedlula izigidi ezimbili – 2.3 million abahlolwa ngomnyaka abatholakala belomkhuhlane wemvukuzane yebele.
IWHO ithi umkhuhlane lo uhlasela kakhulu abesifazane loba utholakala njalo kwabesilisa.
Lonyaka umkhankaso weBreast Cancer Awareness Month uqhutshwa phansi kwesihloko esithi: No-one should face breast cancer alone.
EZimbabwe, uhlangothi lukahulumande olwezempilakahle luthi kulabantu abedlula amakhulu amahlanu – 577 abahlaselwa ngumkhuhlane lo kusukela ngoZibandlela kusiyafika uNhlangula ngomnyaka ka2023. Phakathi kwenani leli, abedlula kancance okuyisilinganiso sokungamatshumi amathathu ekhulwini – 33% babelemvukuzane yebele.
Ngesikhathi kuqhutshwa umkhankaso lo, owake wabangumsekeli womkhokheli kahulumende, uNkosazana Thokozani Khupe, uthi kumele abantu eZimbabwe balwisane lomkhuhlane lo njalo abalawo behambe ezibhedlela ngokuphangisa.
"IBreast cancer iyahlasela omama labobaba ngakho kuqakathekile ukuthizihlola ungathola ukuthi ibele lakho seliguqukile selibuhlungu seliphuma amanzi, kumbe lifotokile kumbe selilikhulu ukudlula elinye, gijima uye esibhedlela uyehlolwa ngoba ingananzelelwa kusasemasinya iyelapheka. Kodwa ingananzelelwa isingene kakhulu emzimbeni kunzima ukuyelapha njalo kuyadula."
UMaKhupe uthi kumele uhulumende abelemitshina yakulez’insuku eyokuhlola umkhuhlane wemvukuzane.
"Thina njengeThokozane Khuphe Cancer Foundation sithi kuqakathekile ukuthi uhulumende wethu weZimbabwe athenge imitshina emikhulu oCT labo PepScan, ama mamogram, lama radiation ukuze wonke umuntu obanjwa yicancer bafike benelise ukukuhlola bakutshele isimo osukiso bakwelaphe."
Kulabanye abaphepha kumkhuhlane webele abathakazelela umkhankaso weBreast Cancer Awareness Month. Omunye wabo nguDokotela Mildred Mnkandla, oseleminyaka edlula amatshumi amabili – 21 waphepha kumkhuhlane lo.
"Inengi liyesaba abanye balenhloni lokukhuluma ukuba balemvukuzane njalo kuyahlupha ngoba umkhuhlane uyamemetheka emzimbeni ucine ubabulele. Omama abanengi bafika esibhedlela sekonakel.”
Abezempilakahle bathi imvukuzane yebele ilandela eyesibeletho ehlasela kakhulu abesifazane. UDokotela Maphios Siyamchembu, umqondisi wezempilakahle koBulawayo ekuhlangothi lukahulumande, uchasisa ngesimo lesi.
"Eyakuqala imvukuzane ngeyomlomo wesibeletho, inyanga kaMfumfu yinyanga esikhumbuzana ngayo ngokwebqavela imvukuzane yesibeletho sikhuthaza ukuthi abesifazana bonke baye esibhedlela esiseduze labo baye hlolwa bafundiswe langokuzihlola imvukuzane uma kulenguquko engabangela imvukuzane yebele. Esibhedlela seUBH silodokotelan owafundela ukwelapha ibele, ulekilinika lapho elapha khona omama imikhuhlane yebele kodwa injongo yakhe yikwelapha imvukuzane yebele ingakakhuleli umuntu."
Uphenyo olwenziwa ngabeZimbabwe National Registry ngomnyaka ka2019 lwaveza ukuba abesifazane abalitshumi lambili ekhulwini bahlaselwa yimvukuzane yebele kodwa ehamba phambili ngeyesibeletho.
AbeGlobal Cancer Observatory labo babika ngomnyaka ka2022 ukuthi imvukuzane yebele isivame kakhulu emhlabeni wonke jikelele ngakho-ke kumele kudingwe amaqhinga okulwisana layo.
SEE ALSO:
Udaba Esilwethulelwe NguAnnahstacia Ndlovu