Osakhulayo oleminyaka engamatshumi amathathu yokuzalwa utshayelwa ihlombe ngabanengi, ngenxa yekilinika owayisungulayo ngomnyaka ka2018 eHarare eyokusiza abesilisa kwezempilakahle njalo uthi kunengi okungenziwa ngabasakhulayo ukuze labo baphathise ezigabeni zabo.
UBen Jammaine Ncube wasungula ikilinika yakhe ebizwa ngokuthi yiMen’s Health Clinic efuna ukunceda abesilisa.
“Mina ngafundela ukuba ligqwetha esikolo, ngoba ngikhula yiwo umsebenzi engangiwufuna. Kodwa lokhu ngangisizwa kungenelanga. Yikho ngathatha ithuba lokwenza into engasiza umphakathi, ikakhulu amadoda labafana, uma sikhangelane lempilakahle yabo. Ngabona ukuthi esikhathini esinengi, abesilisa kabayi emtholampilo ngenxa yezizatho ezithize, yikho ngadinga indlela yokubanceda ngayo, iMen’s Health Clinic.”
Kodwa uNcube uthi kwakungalula ukuthi iphupho lakhe lokunceda abesilisa ngezempilakahle lifezeke.
“Yisikhathi esinengi lapho abantu abalombono wokusungula, kungaba ngamabhizimusi kumbe amankampani, beswele okufunakayo ukuze amaphupho abo agcwalisiswe. Yikho engahlangana lakho lami, ngoba imali kanye lobungcitshi balokho engangifuna ukukwenza, ngangingela. Kodwa ngithanda ukubonga ubaba wami owangiphathisa ngemali yokuqala, kanye lezihlobo labangani abama lami ngesikhathi ngitshaywa likhanda ukuthi ngizazihambisa njani izinto.”
Ikilinika kaNcube, eseHarare, inceda amadoda labafana endabeni zonke ezimayelana lempilakahle yabo- egoqela eyemzimbeni leyengqondo.
Uthi okuqakathekileyo ngekilinika le, yikuthi akubandlululwa muntu, njalo abesilisa bayakhululeka ukukhuluma ngendubo zabo zonke kungela kuthonisiswa.
Omunye osakhulayo ohlala eBelgravia eHarare, kodwa ongathandanga ukuthi ibizo lakhe laziswe, uthi wancedakala okwamagama eMen’s Health Clinic.
“Okwayenzakala yikuthi ngomnyaka ka2023, ngananzelela ukuthi ngangilomkhuhlane wasemacansini. Kodwa emtholampilo yakuleli, ungaya khona usesimeni engangikuso, bayakuhleka kumbe bayakuthethisa, yikho ngingayanga khona. Ngithe ngidinga inhlanganiso ezisebenza lamadoda endabeni zempilakahle, ngatshayisana leMen’s Health Clinic. Ngahamba emahofisini abo bangiphatha kuhle kakhulu, ngathola uncedo lonke engangilufuna. Yindawo ekhululekileyo okwamagama.”
UNkosikazi Marvelous Moyo, yena ocubungula indaba zezigaba ezimele, uthi inyathelo elathathwa nguNcube liyancomeka.
“Balutshwane abasakhulayo abangacabanga ukwenza okwenziwa nguBen lokhu. Ngokumemetheka kwezidakamizwa kulezinsuku, kuyaduduza ukubona abanye ontanga beqinisela ukunceda uzulu. Okufunakalayo yikuthi imizamo leyi ithole usizo olufaneleyo oluvela kuhulumende. Ngesinye isikathi, izimali ababhadalisa abantu ukuze besizwe, ziphansi kakhulu, okokuthi azenelisi ukuthi ikilinika leyi isebenze ngokufaneleyo. Uhulumende lezinye inhlanganiso ezenelisayo, sicela bencede.’
UNcube uxwayise abanye abasakhulayo ukuthi bengayekeli ukugijimisa amaphupho abo.
“Nxa ulento ofuna ukuyiyenza, ungadinwa ukusebenza ukuze uyiyenze. Okuqakathekileyo yikuthi udinge abantu abathakazelela umbono wakho, ukuze labo bekukhuthaze, kanye lokukunika olunye uncedo. Njengabontanga, kunengi esingakwenza ezigabeni zethu, yikho ngisithi phakama ntanga. Ngilethemba lokuthi uhambo lwami luzanika omunye umuntu amadlabuzani okuya phambili ngalokho akuthandayo.”
UNcube uthi abesilisa abedlula inkulungwane sebancedakala eMen’s Health Clinic, njalo kukhangelelwe ukuba inani lamadoda adinga uncedo, ikakhulu kwabasakhulayo, lizaqansa, ngenxa yomnotho welizwe ongamanga kuhle, okuyikho ingcwethi kwezempilakahle ezithi kubangela izifo ezetshiyeneyo.
UNcube wayekuhlelo lweMandela Washington Fellowship for Young African Leaders, njalo usekhethwe ukuba angene kuhlelo lweDuke Emerging Leaders Institute.
SEE ALSO:
Udaba Esilwethulelwe NguTobias Mudzingwa