Amazwe ayisikhombisa emhlubulweni weningizimu yezwekazi leAfrica ngoLwesihlanu asungule umbuthano wokuthakazela ilanga lokunanza amalungelo abantwana i-World Children’s Day edolobheni leVictoria Falls.
Umbuthano lo ukhangelelwe ukubalezethekeli ezifika inkulungwane eziyisikhombisa -7,000 ezigoqela abakhokheli bamazwe abadabuka emhlubulweni weSouthern African Development Community.
Ilanga labantwana leli lithakazelelwa minyaka yonke mhla zikuLwezi 20, ngakho eleZimbabwe lonyaka likhethwe ukuba lithwale lumthimba edolobheni leli esikolo seBaobab Primary School.
Omunye wabaphatheke kulumthimba nguMnumzana Trymore Ndolo ohola inhlanganiso yamalungelo abantwana emhlubulweni we Matabelaland North eyePathways Women Empowerment and Girl Child Support Networt, othi kusasa bazacijiswa ngezifundo zendingeko zabantwana.
“Mbona ekuxoxisaneni kuyasincedisa njengenhlanganiso ukuthi sikwanise ukuthi sinanzelele, sifunde njalo ukuthi singathuthukisa njani emsebenzini esiyenzayo sibhaekane lokuthuthukisa abantwana.”
Sixoxe njalo loMnumzana Fredrik Mafira ohola inhlanganiso yabakhubazekileyo eyeOur Pride Amputee, esiza abantwana abakuleso isimo.
“Kumele sikhuthaze abantwana abagogekileyo ngokubafundisa esikolo lokubafundisa imisebenzi yezandla ukuze bezinakekele ngikhulumela njalo labayeneleyo emzimbeni ngoba yikho okwakusasa abalakho.”
Unobhala omkhulu wenhlanganiso yomanyano wamazwe omhlaba eyeUnited Nations, uMnumzana Antonio Guterres, uthi ilanga leli liyingqobe ekuhluzeni inhlupho abanwana abahlangana lazo ikakhulu kwezombangazwe.
UNkosazana Iris Zemza Nozizwe Mhlanga, umqondisi wenhlanganiso yeNozizwe Mother of Nations Trust, uyakusekela lokhu.
Okwalamuhla, umthimba lo uhlanganise abafundi bezikolo ezehlukeneyo elizweni lonke ukudlala inguqu yegolf kanye le chess.
Izehlakalo ezinengi zizaphathwa kusasa lapho uMongameli Emmerson Mnangagwa ozavula khona lumthimba ngokusemthwethweni, kodwa phambilini kwalokho abantwana abafika amakhulu ayisithupha bazafola emgwaqweni ekuseni kuthi emini bayeboniswa impophoma zamanzi omfula uZambezi.
Umsekeli kamongameli uMnumzana Constantino Chiwenga lamuhla uzalumathisa isibane abathi yi-Flame of Hope emngceleni weZimbabwe leZambia okuthiwa yi no man’s land, anduba ikhosikazi lika Mnangagwa, uAuxillia Mnangagwa, aphathe idili lokudla lezethekeli e Elephant Hills Hotel.
Izikhulumeli zikhangelelwe ukuxoxisana ngezizakwenza ukuthuthukisa imfundo yabantwana kuzwekazi leli, ukuguquka komkhathi, ukunakekelwa kwabakhubazekileyi kanye lokuhlonitshwa kwelungelo labantwana ngokusemthethweni.
SEE ALSO:
Udaba Ezilwethulelwe NguNokuthaba Dlamini