Inhlanganiso ezilwela amalungelo oluntu eZimbabwe zinanze usuku lomkhankaso wokuqeda ukuhlukuluzwa kwabantu olweInternational Day in Support of Victims of Torture ngoLwesithathu ngokukhuthaza uhulumende ukuthi akhulule amalunga ebandla leCCC angamatshumi phose ayisitshiyangalombili, 79, abotshwe ngeviki edluleyo atshaywa kakubi ngamapholisa.
AbeCCC laba balokhe bevalelwe. Bamiswe enkantolo liviki abanye babo besehluleka ukuhamba ngenxa yokubhaxabulwa ngamapholisa ngeviki edluleyo beseHarare endlini kaMnu. Jamson Timba ngesikhathi benanza usuku lweInternational Youth Day.
Inhlanganiso ezigoqela eyeZimbabwe Human Rights NGO Forum, iZimbabwe Human Rights Association, Zimbabwe Peace Project kanye leyeMatabeleland Institute for Human Rights, zithi uhulumende weZanu PF kumele asayine umthetho weUnited Nations ovimba ukuhlukuluzwa kwabantu oweConvention Against Torture.
Isahluko 53 sesisekelo sombuso weZimbabwe laso sikubeka sobala ukuthi akulamuntu omele ahlukuluzwe ngendlela abeCCC abathi batshaywa ngayo ngamapholisa.
Usuku lweInternational Day in Support of Victims of Torture lunanzwa emhlabeni jikelele.
Sixoxe lesiphathamandla seMatabeleland Institute for Human Rights, uMnu. Khumbulani Maphosa.
Your browser doesn’t support HTML5
Ingxoxo loMnu Khumbulani Maphosa
Umphathintambo wezemithetho uMnu. Ziyambi Ziyambu ubengabambeki, kodwa isikhulumeli samapholisa Assistant Commissioner Paul Nyathi utshele lumsakazo liviki ukuthi abantu abayabe bekhala ngokuthi bahlukuluziwe kumele bayemangala emapholiseni.